Ոստիկանապետից պարզաբանումներ են խնդրում ակտիվիստներին բերման ենթարկելու հետ կապված

ՀՀ մարդու իրավունքների պաշտպան Կարեն Անդրեասյանը դիմել է ՀՀ ոստիկանապետ Վլադիմիր Գասպարյանին՝ խնդրելով հիմնավորել, թե ինչու են ապրիլի 9-ին Երևան քաղաքի ոստիկանության տարբեր բաժիններ քաղաքացիներ բերման ենթարկվել:

Իր նամակում օմբուդսմենը հիշեցնում է, որ Էրեբունու բաժին են բերման ենթարկվել Եղիա Ներսեսյանը, Վարդգես Պետրոսյանը, Մարիամ Սուխուդյանը, Արման Ալեքսանյանը, Արման Վերմիշյանը, իսկ Արաբկիրի բաժին՝ Սամվել Իսրայելյանը, Դավիթ Ստեփանյանը, Անտոն Իպչենկոն, Հայկ Գրիգորյանը, Գոհար Սարոյանը, Շողակաթ Վարդանյանը, Անուշ Պողոսյանը, Թերմինե Դովլաթյանը, Կարեն Հարությունյանը, Սարո Սարոյանը, Գևորգ Սաֆարյանը, Հովհաննես Ղազարյանը, Կարեն Օհանյանը, Պարույր Մովսիսյանը, Արսեն Օհանյանը, Արմեն Մարտիրոսյանը:

«Նկատի ունենալով 2013թ. ապրիլի 9-ին տեղի ունեցած իրադարձությունների կապակցությամբ ձևավորված հասարակական հնչեղության հանգամանքը և ղեկավարվելով «Մարդու իրավունքների պաշտպանի մա­սին» ՀՀ օ­րեն­քի դրույթներով` խնդրում եմ տալ Ձեր պարզաբանումները վերոհիշյալ յուրաքանչյուր կետում նշված անձանց, այդ թվում նաև Անդրեաս Ղուկասյանին ՀՀ ոստիկանության Երևան քաղաքի վարչության բաժիններ բերման ենթարկելու իրավական հիմնավորվածության վերաբերյալ:

Միաժամանակ խնդրում եմ տրամադրել տեղեկատվություն Արմեն Մարտիրոսյանի հետ տեղի ունեցած միջադեպի կապակցությամբ Ձեր կողմից ձեռնարկված /ձեռնարկվող/ միջոցառումների վերաբերյալ:

Խնդրում եմ հայտնել նաև, թե ինչ իրավական հիմնավորվածությամբ է 2013թ. ապրիլի 9-ին Երևան քաղաքի Բաղրամյան պողոտան փակվել, ինչի արդյունքում սահմանափակվել են այլոց ազատ տեղաշարժման իրավունքը:

Ձեր պատասխանն ակնկալում եմ ստանալ 3-օրյա ժամկետում», – գրել է Կարեն Անդրեասյանը: