Epress.am Լուրեր Հայաստանից
Քաղաքացիական ակտիվիստները Երևանի ավագանու ընտրություններին մասնակցող ընդդիմադիր ուժերին կոչ են անում ձևավորել «Երևանի փրկության համար» պլատֆորմ՝ որպես գալիք ընտրություններին միասնաբար մասնակցելու քաղաքական հիմք: Այս կոչի հեղինակն է «Փրկենք Երևանը» նախաձեռնությունը:
Ըստ նախաձեռնության անդամների՝ մինչ կարգավորման նոր մեխանիզմների ձևավորումը պետք է սառեցնել Երևանի կենտրոնի բոլոր քաղաքաշինական գործընթացները, սառեցնել Ազգային Ժողովի, Կառավարության, Երևանի քաղաքապետարանի և ցանկացած այլ ատյանների` Երևանի կենտրոնի կառուցապատմանը կամ պատմամշակութային հուշարձաններին վերաբերող արդեն իսկ ընդունված որոշումների իրագործումը, կասեցնել ցանկացած շինարարական գործունեություն Երևան քաղաքի կանաչ գոտիներում, ՀՀ Ոստիկանությանը հանձնարարել՝ միջամտել և կասեցնել վերը նշված կարգի ցանկացած աշխատանքները:
Ակտիվիստները առաջարկում են վերոնշյալ պահանջները ընդունել որպես «Երևանի փրկության համար» միասնական պլատֆորմի նախընտրական և հետընտրական ծրագիր:
«Ջանքեր չենք խնայի, որպեսզի առաջիկա` Երևանի ավագանու ընտրություններին ընտրողները քվեարկեն ընդդեմ այն քաղաքական ուժի կամ ուժերի, որոնք իրենց ծրագրերում չեն ունենա համապատասխան բաժին՝ կազմված իրատեսական և գոհացուցիչ թեզերից: Պայքար կմղենք ընդդեմ այն ուժի կամ ուժերի, որոնք Երևանի ավագանի ընտրվելուց հետո կհրաժարվեն «Երևանի փրկության համար» առաջարկվող պահանջները կատարելուց»,- նշում են ակտիվիստները: