Հայազգի Միշան Բոսթոնի ահաբեկչի հետ շփվել է, բայց «ուղեղը չի լվացել»

Բոսթոնում տեղի ունեցած ահաբեկչության գլխավոր կասկածյալ Թամերլան Ցարնաևի (լուսանկարում) ծանոթ հայազգի Միխայիլ Ալախվերդովը հերքել է լուրերն այն մասին, թե իբր ինքն ազդել է ահաբեկչի հայացքների արմատականացման վրա, գրում է The New York Review of Books-ը: Ալախվերդովը, ով վերջին օրերին մամուլում ներկայացվում էր որպես Միշա անունով իսլամ ընդունած հայ, ասել է, որ մի քանի տարի առաջ իսկապես շփվել է Ցարնաև-ավագի հետ, սակայն նրա «կրոնական ուսուցիչը» չի եղել:

«Եթե ես նրա ուսուցիչը լինեի, կհամոզվեի, որ նա երբեք նման բան չի անի», – ասել է Ալախվերդովը: Նա պատմել է, որ 3 տարի առաջ, երբ բնակվում էր Բոսթոնում, շփվում էր Ցարնաևների հետ, սակայն պնդել է, որ երբեք չի տեսել ընտանիքի հարազատներին, որոնք այժմն նրան մեղադրում են եղբայրների հայացքների արմատականացման մեջ: Ալախվերդովը հաստատել է իր՝ մահմեդական լինելը, սակայն Ցարնաևների հետ իր հարաբերությունների բնույթի մասին հրաժարվել է խոսել:

Հիշեցնենք, որ հայկական ծագում ունեցող Միշա անունով երիտասարդի՝ Ցարնաև եղբայրների «ուղեղները լվանալու» մասին հայտնել էր եղբայրների հորեղբայր Ռուսլան Ցարնին:

Ընտանիքի՝ Ալախվերդովի հետ շփվելու մասին խոսել է նաև Թամերլանի և Ջոհարի մայրը՝ Զուբեյդաթը: Մոր խոսքով՝ ինքն ամաչում էր, որ, լինելով մահմեդական, ավելի քիչ էր աղոթում, քան մահմեդականություն ընդունած Ալախվերդովը:

Միխայիլ Ալախվերդովն այժմ բնակվում է Ռոդ-Այլենդում: Նա համագործակցում է Դաշնային հետախուզական ծառայության աշխատակիցների հետ:

39-ամյա Ալախվերդովը ծնվել է Ադրբեջանում՝ հայի և ուկրաինուհու ընտանիքում: 1990թ. հայերի վտարման ժամանակ ընտանիքն Ադրբեջանից տեղափոխվել է ԱՄՆ:

Հիշեցնենք, որ ապրիլի 15-ին Բոսթոնում տեղի ունեցած ահաբեկչության մեջ կասկածվող 26-ամյա Թամերլանը սպանվել է, իսկ նրա 19-ամյա եղբայրը՝ ձերբակալվել: