Home / Հայաստան / Վճռաբեկի մոտ սպասում են ՀԱԿ ակտիվիստների գործով «Սերժ Սարգսյանի որոշմանը»

Վճռաբեկի մոտ սպասում են ՀԱԿ ակտիվիստների գործով «Սերժ Սարգսյանի որոշմանը»

«Հայ Ազգային Կոնգրես» կուսակցության փոխնախագահ Լևոն Զուրաբյանը որևէ ակնկալիք չունի ակտիվիստներ Տիգրան Առաքելյանի, Արտակ Կարապետյանի, Դավիթ Քիրամիջյանի և Սարգիս Գևորգյանի գործով ՀՀ Վճռաբեկ դատարանի որոշումից: Այս մասին Զուրաբյանն ասել է այս պահին դատարանի մոտ անցկացվող ակցիայի ժամանակ:

«Ինչ ուզում են՝ թող անեն, միևնույն է՝ մենք մեր պայքարը շարունակելու ենք: Ուզում են ընտրություններ կեղծեն, ուզում են մարդկանց բանտ նստեցնեն, ոչնչով չեն կարողանա խափանել մեր ընթացքը դեպի հաղթանակ», – Epress.am-ի հետ զրույցում ասել է ՀԱԿ փոխնախագահը:

Քաղաքացիական ակտիվիստ Ծովինար Նազարյանը, ով դատարանի շենքի մոտ բազմաթիվ հավաքվածների հետ միասին սպասում է Վճռաբեկ դատարանի որոշմանը, Epress.am-ին ասել է, որ արդարադատությունը Հայաստանում ընդամենը պատժիչ մեքենա է:

«Այս դատավարությունը ոստիկանապետության դրսևորումներից է, և չի կարող ոստիկանապետությունը այսպես շարունակել: Այս տղաները պետք է ազատվեն դատարանի դահլիճից: Դրա համար ենք մենք այստեղ», – ասել է ակտիվիստը:

Ակցիայի մասնակիցներից շատերը նշում են, որ հույս չունեն, որ դատարանը արդար որոշում կկայացնի, սակայն իրենց ներկայությամբ և պայքարով նպատակ ունեն դժվարացնել իշխանությունների գործը:

«Այն որոշումը, որը կկայացնի Սերժ Սարգսյանը, կհրապարակվի այս դատավարության ավարտին: Մեր ձայնը միշտ հասանելի է իշխանություններին, բայց իշխանությունների հանցավոր բնույթը թույլ չի տալիս, որ դատարաններն արդար որոշում կայացնեն: Հենց այդ պատճառով էլ այս դատարանից որևէ ակնկալիք չկա: Մեր պայքարը ոչ թե նպատակ ունի հասցնել մեր ձայնը իշխանություններին, այլ դժվարացնել իշխանությունների կյանքը, մասնավորապես, հանցավոր գործունեությունը ծավալելու ընթացքում», – մեզ հետ զրույցում ասել է ՀԱԿ ակտիվիստ Սարգիս Գևորգյանը: