Նոյեմբերյանում վիրավորված զինվորը գիտակցության չի եկել, բայց «դինամիկա կա». ՊՆ խոսնակ

Մայիսի 15-ին Նոյեմբերյանի զորամասում գլխի մասում հրազենային վնասվածք ստացած, ներկա պահին Մուրացանի զինվորական հոսպիտալի վերակենդանացման բաժանմունքում գտնվող ժամկետային զինծառայող Հրաչյա Սարգսյանի վիճակը շարունակում է մնալ կայուն ծանր: Այս մասին Epress.am-ի հետ զրույցում ասել է ՀՀ պաշտպանության նախարարության մամլո խոսնակ Արծրուն Հովհաննիսյանը:

«Դրական դինամիկա կա, գիտակցության դեռևս չի եկել, բայց նշաններ ցույց է տվել:

Կարող եմ ասել՝ վիճակը հուսադրող է», – ասել է Հովհաննիսյանը:

Նշենք, որ համաձայն պաշտոնական վարկածի,  զորամասի պահակախմբի մուտքի դիտորդ Դավիթ Խաչատրյանն իրեն ամրակցված ԱԿՄ տեսակի ինքնաձիգից կրակել էր, ինչի հետևանքով պահակախմբում ընդգրկված 19-ամյա զինծառայող Լյուքս Ստեփանյանը գլխի շրջանում ստացած հրազենային վիրավորումից անմիջապես մահացել է, իսկ մյուս զինծառայողը` 19-ամյա Հրաչյա Սարգսյանը, գլխից վիրավորվել է:

Դավիթ Խաչատրյանը դեպքից անմիջապես հետո ձերբակալվել է:

Լյուքս Ստեփանյանի թաղմանը օրը ծնողները որոշել էին դագաղը Երևան բերել և բողոքի ակցիա անցկացնել ՀՀ կառավարության շենքի դիմաց: Սևանի մայրուղու վրա նրանց հանդիպել էր ՀՀ պաշտպանության նախարար Սեյրան Օհանյանը և բանակցություններից հետո ծնողների հետ գնացել է գյուղ ու մասնակցել հուղարկավարության արարողությանը: