Epress.am Լուրեր Հայաստանից
Այս տարվա ապրիլին Էկոնոմիկայի նախարարի պաշտոնը ստանձնած Վահրամ Ավանեսյանը 100 միլիոն դրամ երկու բիոզուգարանների համար չէր վճարի: Այս մասին նա հայտարարել է այսօր ՀՀ կառավարությունում կայացած մամուլի ասուլիսի ժամանակ՝ անդրադառնալով ՀՀ կառավարության կողմից 2010 թվականին կայացրած բիոզուգարաններ գնելու մասին որոշմանը:
«Եթե դուք իմ կարծիքն եք ուզում իմանալ, ապա, այո, ես չէի տա այդքան գումար երկու զուգարանի համար: Բայց այդ զուգարանների գինը համապատասխանում է որակին: Դրանք ամենալավն են, տարբեր երկրներում տեղադրվում են և, վիճակագրության համաձայն, դա ավելացնում է տուրիզմը», – ասել է նախարարը՝ պատասխանելով լրագրողի հարցին:
Ըստ նրա՝ տուրիզմի ավելացումը, սակայն, լրագրողները չեն կապում տեղանքում կողմնորոշման նշանների տեղադրման, զուգարանների տեղադրման հետ:
«Ես ուզում եմ հասկանալ՝ եթե 30 միլիոն դրամանոց լինեին, ձեզ մոտ հարց կառաջանա՞ր, թե՞ ոչ: Հայաստանին զուգարաններ պե՞տք են, թե՞ ոչ»,- ասել է Ավանեսյանը: