Home / Հայաստան / ՀՀ ոստիկանապետին խնդրում են ապահովել Պուտինի դեմ հավաքի մասնակիցների անվտանգությունը

ՀՀ ոստիկանապետին խնդրում են ապահովել Պուտինի դեմ հավաքի մասնակիցների անվտանգությունը

Այսօր Երևանի Ազատության հրապարակում ՌԴ նախագահ Վլադիմիր Պուտինի դեմ անցկացվող հավաքն օրինական է։ Այս մասին ասված է հավաքի կազմակերպիչներից մեկի՝ Դանիել Իոաննիսյանի՝ ՀՀ ոստիկանապետ Վլադիմիր Գասպարյանին ուղղված բաց նամակի մեջ։

«Ենթադրում եմ, որ արդեն տեղյակ եք, որ այսօր ժամը 13:00-ին Երևան քաղաքի Ազատության հրապարակում տեղի կունենա հանրահավաք, որին կհաջորդի նաև երթ:

Հարկ եմ համարում հայտնել, որ հավաքի առիթ հանդիսացող ՌԴ նախագահ Վլադիմիր Պուտինի պետական այցի մասին պաշտոնապես հայտարարվել է ս.թ. նոյեմբերի 27-ին: Այսինքն, հավաքի կազմակերպիչները հավաքի մասին լիազոր մարմնին ոչ շտապ հավաքի համար սահմանված ժամկետում իրազեկում չէին կարող ներկայացնել:

Ուստի, համաձայն հավաքների Ազատության մասին ՀՀ օրենքի 26-րդ հոդվածի, այսօրվա հավաքը շտապ հավաք է, ինչի մասին իրազեկվել է լիազոր մարմինն:

Որպես հավաքի մասնակից խնդրում եմ ապահովել հավաքի (այդ թվում` հանրահավաքի և երթի) անվտանգույթունը, ինչպես նաև ՀՀ Սահմանադրության 29-րդ հոդվածով, Հավաքների ազատության մասին ՀՀ օրենքով և Մարդու Իրավունքների Եվրոպական Կոնվենցիայի 11-րդ հոդվածով սահմանված հավաքներ անցկացնելու իրավունքի իրացման իրացումը», – ասված է Իոաննիսյանի նամակում: