Հայ բանաստեղծն ադրբեջանցի երգչուհուն առաջարկում է գրավել Ղարաբաղը

Հայ բանաստեղծ Լյուբիկ Չիբուխչյանն իր հերթական գիրքը նվիրել է ադրբեջանցի երգչուհի Էլնարա Աբդուլաևային։ 173- էջանոց «Էլնարա» ձոնը գրելիս հեղինակը ոգեշնչվել է ադրբեջանական հեռուստատեսությունից, որը հասանելի է Տավուշի մարզում։ Չիբուխչյանին ոգեշնչել է Աբդուլաևայի « A bülbül» կատարումը (խոսքերը՝ Սերվեր Շահբեյլիի, երաժշտությունը՝ Ասիֆ Քերիմովի)։

«Էլնարա» գրքում հեղինակը փիլիսոփայում է կյանքի, տիեզերքի մասին, գովերգում է կնոջ գեղեցկությունը, սերը, հիանում է ադրբեջանցի երգչուհու տաղանդով, իր ափսոսանքն արտահայտում հանդիպելու ու ծանոթանալու անկարողության մասին։ Նա երգչուհուն կոչ է անում գալ ու իր գեղեցիկ երգերով գրավել Ղարաբաղը, քանի որ երգչուհին երգում է Ղարաբաղի մասին ու ասում, որ այն իրենն է։ Հեղինակը, մասնավորապես, առաջարկում է ինքնաձիգը քյամանչայով փոխարինել։

Գրականությամբ զբաղվելուց բացի, իջևանցի Լյուբիկ Չիբուխչյանը զբաղեցնում է Տավուշի մարզպետի խորհրդականի պաշտոնը։ BBC-ի ադրբեջանական ծառայության երևանյան թղթակցի հետ զրույցում գրողը խոստովանել է, որ «Ֆեյսբուք» սոցիալական ցանցի միջոցով փորձել է կապ հաստատել Աբդուլլաևայի հետ, բայց՝ ապարդյուն։ Չիբուխչյանի խոսքով՝ Աբդուլաևան տաղանդավոր երգչուհի է՝ հիանալի ձայնով, ու ինքն իր գրքով «սահմանամերձ Տավուշից խաղաղության մասին ուղերձ է հղում ադրբեջանցիներին»։

2003 թվականին Չիբուխյանը ԶԼՄ-ների ուշադրությունը գրավեց ՌԴ նախագահ Վլադիմիր Պուտինին նվիրված իր ձոնով, որն իրենից ներկայացնում էր մի նախադասություն՝ 1200 տողից բաղկացած։ Նա ստեղծագործություններ է ձոնել նաև Իրանի առաջնորդ Մահմուդ Ահմադինեժադին ու ռուսաստանցի քաղաքական գործիչ Վլադիմիր Ժիրինովսկուն։

Հեղինակի խոսքով՝ «Էլնարա» գիրքն արդեն թարգմանվում է ռուսերեն ու ադրբեջաներեն լեզուներով։