ՀՀԿ-ական պատգամավորներին սուլոցներով դիմավորեցին․ ակցիա ԱԺ-ի մոտ

Ազգային ժողովի շենքի դիմաց այս պահին 100-ից ավել մարդիկ բողոքում են Հայաստանի և Ռուսաստանի միջև կնքած՝ «ՀայՌուսգազարդ» ընկերության բաժնեմասերի 20 տոկոսը Ռուսաստանին հանձնելու համաձայնագրի, ինչպես նաև երկու երկրների միջև գազի գնի վերաբերյալ կնքած պայմանագրերի դեմ։ Նշենք, որ համաձայնագրերի վավերականացման քվեարկությունը պետք է կայանար դեռևս ուրբաթ, սակայն ՀՀԿ-ին չի հաջողվել անհրաժեշտ թվով պատգամավորներ ապահովել դահլիճում, և ԱԺ նախագահ Հովիկ Աբրահամյանը քվեարկությունը տեղափոխել է երկուշաբթի։   

Դեռևս 11։30-ից ակտիվիստների մի խումբ ՀՀԿ-ական պատգամավորներին սպասում էր Դեմիրճյան փողոցի ԱԺ մուտքի մոտ՝ նրանց դիմավորելով սուլոցներով։ 12։00-ի մոտ բողոքի ակցիայի մասնակիցները «Ազատ, անկախ Հայաստան» վանկարկումներով շարժվեցին դեպի Բաղրամյան պողոտա՝ կենտրոնական մուտքի մոտ։ Այս պահին մարդիկ կանգնած են դարպասների մոտ, նրանց շուրջ տասնյակ ոստիկաններ են հավաքվել։