Home / Հայաստան / Վարդան Ղուկասյանի դստեր փեսացուի սպանության մեջ մեղադրվողի համար 15 տարի են պահանջել

Վարդան Ղուկասյանի դստեր փեսացուի սպանության մեջ մեղադրվողի համար 15 տարի են պահանջել

Գյումրիի նախկին քաղաքապետ Վարդան Ղուկասյանի դստեր փեսացուի՝ Կարեն Եսայանի սպանության մեջ մեղադրվող Հարություն Սարգսյանի համար պետմեղադրող Արմեն Մարուխյանը երեկ 15 տարվա ազատազրկում է պահանջել:

Ինչպես փոխանցում է asparez.am-ը, Մարուխյանը ճառում նշել է, թե Սարգսյանի կողմից կատարած հանցագործությունները հիմնավորվել են նախաքննության ընթացքում ձեռք բերված և դատարանում հետազոտված մի շարք ապացույցներով:

Պետմեղադրողն իր կողմից նշված ապացույցները, սպանության մասով, պայմանականորեն բաժանել էր 3 խմբի. 1. ապացույցներ, որոնք հիմնավորում են Սարգսյանի սպանությունը կատարելու շարժառիթը, 2-րդ, որոնք հաստատում են Հարությունի կողմից Կարեն Եսայանին սպանելու նպատակով նրան հետապնդելը, 3-րդ խումբն այն ապացույցներն են, որոնք վերաբերում են սպանության օրը Սարգսյանի գործողություններին և անմիջականորեն հաստատում են Սարգսյանի կողմից սպանության կատարումը:

Մեղադրական ճառը ներկայացնելու ընթացքում ամբաստանյալը, ով վատառողջ էր, անընդհատ միջամտում էր, հակադարձում իրեն առաջադրված մեղադրանքներին ու պետմեղադրողի բերած հիմնավորումներին: Պետմեղադրողը ստիպված եղավ մի քանի անգամ դատարանից պահանջել կարգի հրավիրել ամբաստանյալին կամ սանկցիա կիրառել նրա նկատմամբ:

«Դատախազն այս պահին այստեղ հանցագործություն է կատարում: Հարգելի մեղադրող, դուք հանցագործություն եք կատարում, դուք սպանություն եք թաքցնում… Հանցագործ- մեղադրող, տեղերով փոխվելու ենք», – պետմեղադրողի՝ 15 տարվա ազատազրկում պահանջից հետո ասել է Հարություն Սարգսյանը:

Դատական ողջ նիստի ընթացքում լարված մթնոլորտ է տիրել նաև նիստերի դահլիճում: Ամբաստանյալի հարազատներն անընդհատ տեղերից խոսում էին, իսկ վերջում արդեն հեռակա կռիվ անում մեղադրող կողմի հետ:

Պատասխան ճառին պատրաստվելու համար պաշտպանական կողմը 20 օր ժամանակ է խնդրել: Հաջորդ դատական նիստը նշանակվել է փետրվարի 26-ին: