Անի Գևորգյանի հաղորդման հիման վրա քրեական գործ են հարուցել

«Չորրորդ ինքնիշխանություն» օրաթերթի լրագրող Անի Գևորգյանի հաղորդման հիման վրա ՀՀ հատուկ քննչական ծառայությունում նախապատրաստված նյութերով քրեական գործ է հարուցվել` ՀՀ ՔՕ 164-րդ (պաշտոնատար անձի կողմից պաշտոնեական դիրքը օգտագործելով լրագրողական մասնագիտական գործունեությունը խոչընդոտելը) և 309-րդ հոդվածների 2-րդ մասերի (պաշտոնեական լիազորություններն անցնելը) հատկանիշներով:

Ինչպես նշվում է ՀՔԾ-ի մամուլի հաղորդագրության մեջ, Անի Գևորգյանի հաղորդման մեջ ասված է, որ 2014 թվականի փետրվարի 12-ին` ժամը 18։00-ի սահմաններում, Երևանի Մաշտոցի պողոտայում ոստիկանության ծառայողները խոչընդոտել են իր` լրագրողի մասնագիտական գործունեությանը, փորձել են խլել տեսախցիկը, ֆիզիկական ուժի գործադրմամբ բերման են ենթարկել ոստիկանության Կենտրոնականի բաժին, որտեղ վերցրել ու չեն վերադարձրել տեսախցիկի հիշողության քարտը և բռնություն գործադրել իր նկատմամբ: