Նախաձեռնությունը դատապարտում է «Ռուսաստանի ագրեսիայի վերաբերյալ ՀՀ իշխանությունների լռությունը»

Վլադիմիր Պուտինի ռեժիմի՝ Ուկրաինայի տարածքում իրականացվող ինտերվենցիան միջազգային հանրությանը և գլոբալ անվտանգությանը նետված մարտահրավեր է, միջազգային իրավունքի կոպիտ խախտում: Նման գնահատական են հնչված «Մայդանի հետ համերաշխության հայկական կոմիտե» նախաձեռնության տարածած հայտարարության մեջ։

«Այս գործողությունները հիշեցնում են Եվրոպայի պատմության ամոթալի դրվագները` 1938 թվականին Հիտլերի կողմից Ավստրիայի անշլյուսը և Չեխիայի բռնակցումը (անեքսիան):

Ուկրաինայում ստեղծված ներկայիս իրավիճակը էապես այլ կլիներ, եթե 2008 թվականին միջազգային հանրության դիվանագիտական ջանքերը հիմնված լինեյին Վրաստանին տրված անվտանգության գործուն երաշխիքների վրա, և արժանի հակահարված հասցվեր Կրեմլին:

Ներկա ճգնաժամային իրավիճակում ժողովրդավարական բոլոր ուժերի պարտքն է՝ փրկել ազատ Ուկրաինան զավթիչներից և սանձել Մոսկվայի կայսերապետական հավակնությունները:

Հույս ունենք, որ Ազատության համար պայքարող Ուկրաինան արթնացրել է քաղաքակիրթ աշխարհի հանրությանը, ձերբազատել նրան քրեաօլիգարխիկ, համկարգված կոռուպցիայի սկզբունքներով առաջնորդվող իշխանությունների «ինքնակամ փոխակերպման» հնարավորության պատրանքներից, ապացուցելով, որ այդպիսի ռեժիմները հեշտությամբ են ժխտում միջազգային պարտավորությունները և գործարքների գնում էությամբ իրենց հարազատ գործելաոճով առաջնորդվող Կրեմլի հետ:

Մենք դատապարտում ենք Հայաստանի իշխանությունների ոչ արժանապատիվ լռությունը Ուկրաինայի դեմ Ռուսաստանի ագրեսիայի վերաբերյալ:

Կոչ ենք անում միջազգային կազմակերպություններին, բոլոր պետություններին և, առաջին հերթին, ԱՄՆ-ին և Եվրոպական միությանը՝

– կանխել Ուկրաինայի նկատմամբ ահագնացող բռնությունները և պաշտպանել նրա ազատ ընտրությունը, ինքնիշխանությունն ու միասնականությունը՝ համաձայն 1994 թվականի Բուդապեշտի հուշագրի պարտավորվածությունների,

– նետված մարտահրավերին համարժեք, միասնական դիրքորոշմամբ ու համակարգված գործողություններով կանգնեցնել ագրեսորին: Անհապաղ սկսել Ռուսաստանը Մեծ ութնյակի և Եվրոպայի խորհրդի կազմից հեռացնելու գործընթաց,

– բարի կամքի տեր բոլոր մարդկանց՝ ՌԴ իշխանությ ունների հանդեպ դրսեւորել համընդհանուր բոյկոտ և ՌԴ դեսպանատների դիմաց կազմակերպել բողոքի ակցիաներ,

– իրականացնել խիստ պատժամիջոցներ Պուտինի ռեժիմի առանցքային դեմքերի և նրա շրջապատի նկատմամբ՝ զրկել նրանց մուտքի արտոնագրերից, սառեցնել նրանց բանկային հաշիվները, սկսել նախաքննություն և պարզել այդ անձանց պատկանող ընկերությունների ու ձեռնարկությունների օրինականությունը», – նշում են հայտարարության հեղինակները:

Մայդանի հետ համերաշխության հայկական կոմիտեի կազմում են․

Առուստամյան Գայանե- Երևան, Հայաստան

Աֆրիկյան Կարինե- Լոս Անջելես, ԱՄՆ

Բարսեղյան Լևոն- Գյումրի, Հայաստան

Գաբրելյան Հեղինե- Փարիզ, Ֆրանսիա

Եղիազարյան Բորիս-Կիև, Ուկրաինա

Մեհրաբյան Ռուբեն- Երևան, Հայաստան

Մկրտչյան Մուշեղ – Բրյուսել, Բելգիա

Նավասարդյան Բորիս- Երևան, Հայաստան

Հովհաննեսյան Զարուհի- Երևան, Հայաստան

Հովսեփյան Ռուդիկ- Լոս Անջելես, ԱՄՆ

Սաքունց Արթուր Վանաձոր- Հայաստան

Շահնազարյան Դավիթ- Երևան, Հայաստան