Բրուցելոզով հիվանդ Ձորաղբյուրի բնակիչն առողջացել է․ մասնագետները շարունակում են հետազոտությունները

Առողջապահության նախարարության մասնագետները համաճարակաբանական հետազոտություն են կազմակերպել Կոտայքի մարզի Ձորաղբյուր համայնքի 17 տնտեսություններում։ Պատճառը մարտի 3-ին ՀՀ ԳՆ սննդամթերքի անվտանգության պետական ծառայությունից ստացված տեղեկատվությունն է, համաձայն որի Ձորաղբյուրի համայնքի առանձին բնակիչների տնտեսություններում (թվով 17) արձանագրվել է խոշոր եղջերավոր կենդանիների բրուցելոզ հիվանդության դեպքեր (թվով 36 գլուխ՝ լաբորատոր հետազոտությունների արդյունքում):

Առողջապահության նախարարության մասնագետների կողմից իրականացվել է գրեթե 77 անձի արյան նմուշառում, ովքեր շփվել են հիվանդ կենդանիների հետ և նրանց նկատմամբ սահմանվել է բժշկական հսկողություն:

Համաձայն նախարարության հաղորդագրության, արձանագրվել է բրուցելոզով մեկ հիվանդ, որի տնտեսությունում եղել է հիվանդ կով և սպանդի է ենթարկվել:

«Հիվանդն առողջացումով դուրս է գրվել «Նորք» ինֆեկցիոն հիվանդանոցում բուժում ստանալուց հետո: Լաբորատոր հետազոտությունները շարունակվում են, մյուս անձանց վերջնական ախտորոշումը պարզ կլինի կրկնակի հետազոտությունների արդյունքում», – նշված է հաղորդագրության մեջ: