Հայաստանում շահագործվող ավտոմեքենաների պետհամարանիշների «դիզայնը» փոխվելու է. թերթ

«Առաջիկայում Հայաստանում շահագործվող ավտոմեքենաների պետհամարանիշների «դիզայնը» արմատապես փոխվելու է։ Այս մասին գրում է «Հայկական ժամանակ» օրաթերթը:

Կառավարության այսօր կայանալիք նիստի օրակարգում ոստիկանությունը ներկայացնելու է պետհամարանիշների նոր ձևերը։ Ոստիկանությունը այս քայլը հիմնավորել է նրանով, որ պետհամարանիշների վրա օգտագործվող տառերը փոքր են, և հատկապես տեխնիկական միջոցներով՝ արագաչափերով ու տեսախցիկներով արձանագրված խախտումների պարագայում դժվարություն է առաջանում տառերը տարբերակելիս։ Որպես օրինակ բերվում է «O», «Q» «C» «D» տառերի նմանությունը։

Դրանից բացի, ոստիկանությունը փոփոխության անհրաժեշտությունը պայմանավորում է նրանով, որ պետհամարանիշների վրա պետք է պատկերվի ՀՀ դրոշը։

Թերթը նկատում է, որ արդեն գործածվող համարանիշները չեն փոխվելու այնքան ժամանակ, քանի դեռ նոր համարանիշ վերցնելու կարիք չառաջանա։ Նաև չի փոխվում պետհամարանիշներ վերցնելու համար նախատեսված վճարումների չափը։

Մանրամասները՝ թերթի այսօրվա համարում։