Սիրիայում հայաթափել են Քեսաբ համայնքը

Սիրիայի Քեսաբ հայկական համայնքը, շրջակա գյուղերով հանդերձ, հայաթափված է: «Ազատություն» ռադիոկայանի հետ հեռախոսազրույցում  այս մասին տեղեկացրել է Քեսաբի բնակիչ Սիրվարդ Գաբուշյանը, ով այժմ իր հայրենակիցների հետ գտնվում է Քեսաբից 60 կիլոմետր հեռու գտնվող Լաթաքիա քաղաքում:

Մարտի 21-ի առավոտյան Սիրիայի ապստամբները ներխուժել էին թուրք-սիրիական սահմանին գտնվող ամբողջությամբ հայաբնակ Քեսաբի վրա: «Ազատության» զրուցակցի խոսքերով, կրակահերթերը հատկապես հնչել են թուրքական սահմանից:

Բնակիչներին հաջողվել է անվտանգ լքել գյուղը և այժմ նրանք ապաստան են գտել Լաթաքիայի հայկական եկեղեցում և դպրոցում:

«Վերջին լուրն այն է, որ մեր բնակարաններն անցել են ընդդիմադիր զինյալների ձեռքը, այստեղ է գտնվում Կարմիր խաչը և փորձում ենք հասկանալ, թե ինչ է լինելու մեր վերջը»,- ասաց Սիրվարդ Գարբուշյանը:

Նշենք, որ, համաձայն asbarez.com կայքի, Քեսաբում զինված բախումների հետևանքով 80 մարդ է զոհվել։ Պաշտոնական տեղեկատվություն մահացած հայերի թվի մասին չկա։