Վերաքննիչը մերժեց․ Արվեստագետները Շանթի գրաֆիտիի համար ստիպված կլինե՞ն վճարել

ՀՀ վերաքննիչ վարչական դատարանը մերժել է «Արտ լաբորատորիա» արվեստագետների խմբի վերաքննիչ բողոքը։ Այն ներկայացվել էր ՀՀ վարչական դատարանի` բաց թողնված դատավարական ժամկետը վերականգնելու մասին միջնորդությունը մերժելու և հայցադիմումի ընդունումը մերժելու մասին որոշման դեմ:

Ինչպես Epress.am-ին է հայտնել «Արտ լաբորատորիայի» շահերը պաշտպանող «Հելսինկյան ասոցիացիայի» փաստաբան Գայանե Խաչատրյանը, հայցադիմումը ներկայացվել էր սահմանված երկամսյա դատավարական ժամկետից երկու օր ուշացումով, որի առիթ էր հանդիսացել «Հայփոստ»-ի կողմից հետադարձ ծանուցման անդորրագրերը ուշացնելը, որոնք պարտադիր պետք է կցվեն հայցադիմումին, այլապես դատարանը հետ է վերադարձնում դրանք:

Խաչատրյանը նշել է, որ ավելի վաղ Վարչական դատարանը գտել էր, որ դրանք ներկայացնելը պարտադիր չէ, քանի որ ՀՀ սահմանադրական դատարանն իր 2013թ-ի դեկտեմբերի 10-ի որոշմամբ ՀՀ Սահմանադրության 18 հոդվածի 1-ին մասին հակասող և անվավեր է ճանաչել ՀՀ վարչական դատավարության օրենսգրքի /ուժը կորցրել է 07.01.2014թ./ 73-րդ հոդվածում ամրագրված նորմը, որի համաձայն հայցադիմումին կցվում են «հայցադիմումը և դրան կից փաստաթղթերի պատճենները պատասխանողի և գործին մասնակցող այլ անձանց կողմից ստանալը հավաստող փաստաթղթերը»:

2014 թվականի հունվարին ուժի մեջ մտած ՀՀ վարչական դատավարության նոր օրենսգրքով, սակայն, կրկին սահմանվել է անվավեր ճանաչված նորմը, որը թյուրիմացության մեջ է դրել հայցվորներին:

«Այս գործով կրկին անգամ ապացուցվում է որ ՀՀ սահմանադրական դատարանի կողմից ընդունված որոշումները անտեսվում են ԱԺ-ի կողմից, ինչպես նաև այն, որ ՍԴ հետևողական չի լինում իր իսկ կողմից կայացված որոշումների ի կատար ածմանը, ինչը սպասվում է նաև պարտադիր կուտակայինի վերաբերյալ ընդունված որոշման հետ», – ասել է Խաչատրյանը:

Հայցվորները պատրաստվում են նոր հայցապահանջ ներկայացնել Վարչական դատարան։

Հիշեցնենք, որ արվեստագետները պահանջում էին անվավեր ճանաչել ՀՀ ոստիկանության Արաբկիրի բաժնի պետ Գրիշա Ամիրխանյանի կողմից 2013 թվականի դեկտեմբերին կայացրած յուրաքանչյուրի նկատմամբ 30.000-ական դրամ վարչական տույժ նշանակելու մասին որոշումը։ Վիճարկվող որոշումը կայացվել էր քաղբանտարկյալ Շանթ Հարությունյանի գրաֆիտին պատերին պատկերելու համար։