Սերժ Սարգսյանի պատճառով ծառացած խնդիրները չեն հուզում ՀՀ դատական ատյաններին․ ՀՔԱ Վանաձորի գրասենյակ

Սերժ Սարգսյանի՝ Մաքսային միությանը միանալուն ուղղված գործողությունների դեմ Հելսինկյան քաղաքացիական ասամբլեայի Վանաձորի գրասենյակի բողոքը վարույթ չի ընդունվի։ Դա նշանակում է, որ Հայաստանի խնդիրները չեն հուզում երկրի դատարաններին, ասված է կազմակերպության պաշտոնական կայքում։

Վճռաբեկ դատարանի վճռի մեջ նշված է, թե դատարանի որոշումն ուժի մեջ է մտնում կայացման պահից, վերջնական է ու բողոքարկման ենթակա չէ։

«Հայաստանի գլխին Ս. Սարգսյանի պատճառով ծառացած խնդիրները ոչ մի կերպ չեն հուզում ՀՀ դատական ատյաններին», – որոշումը մեկնաբանում է ՀՔԱ Վանաձորի գրասենյակը։

2013 թ. սեպտեմբերի 3-ին արված Սերժ Սարգսյանի հայտարարությունից հետո ՀՔԱ Վանաձորի գրասենյակը ՀՀ վարչական դատարան բողոք էր ներկայացրել՝ պահանջելով Սերժ Սարգսյանի՝ Մաքսային միությանն անդամակցելուն ուղղված գործողությունները ճանաչել ոչ իրավաչափ:

ՀՔԱ Վանաձորի գրասենյակի ղեկավար Արթուր Սաքունցը նշել էր, որ ՀՀ կառավարությունը տարիներ շարունակ պատրաստվում էր Ասոցացման պայմանագրի ստորագրմանը, սակայն սեպեմբերի 3-ի հայտարարությամբ և դրանից հետո կայացված որոշումներով այդ քայլերին հակասող դիրքորոշում է արտահայտել: Այսպիսով՝ խախտվել է թափանցիկության սկզբունքը, քանի որ մեկ օրվա մեջ կամայական որոշում է կայացվել:

«Սերժ Սարգսյանի որոշումը նաև պատճառաբանված չէ, որոշումը պիտի բխի ժողովրդի շահերից, այնինչ այդ որոշմամբ վատթարացում է տեղի ունենում, երբ ՀՀ-ի կողմից որոշում է կայացվում Մաքսային միությանն անդամակցել՝ ի տարբերություն Ասոցացման պայմանագրի», – նշել էր Սաքունցը։

Այդ փաստարկները համոզիչ չեն եղել ՀՀ Վճռաբեկ դատարանի համար, որն իր որոշման մասին ՀՔԱ Վանաձորի գրասենյակին գրավոր տեղեկացրել է մայիսի 23-ին։