Օֆշորային սկանդալի հերոսին արտահանձնել են Հայաստանին․ «ՀԺ»

ՀՀ նախկին վարչապետ Տիգրան Սարգսյանի անվան հետ կապված օֆշորային սկանդալում ներգրավված գործարար Աշոտ Սուքիասյանը, ով օֆշորային սկանդալի գործով ձերբակալվել էր ամիսներ առաջ, երեկ արտահանձնել են Հայաստանին։ Այս մասին գրում է «Հայկական ժամանակ» օրաթերթը՝ հղում կատարելով իր աղբյուրներին։

Սուքիասյանը ձերբակալվել էր Վրաստանում այս տարվա հունվարի 31-ին, իսկ նրա արտահանձնման որոշումը կայացվել էր հունիսի 3-ին։

Թերթի տեղեկություններով՝ Սուքիասյանն այժմ գտնվում է «Երևան-Կենտրոն» ՔԿՀ-ում։

Հիշեցնենք, որ Աշոտ Սուքիասյանը, ով արքեպիսկոպոս Նավասարդ Կճոյանի սանիկն է, հետախուզման մեջ էր, նա անցնում է գործարար Փայլակ Հայրապետյանի գործով: Սուքիասյանը մեղադրվում է առանձնապես խոշոր չափերով խարդախության, խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու և հանցավոր ճանապարհով ստացված առանձնապես խոշոր չափերով եկամուտներն օրինականացնելու մեջ:

Ավելի վաղ hetq.am-ը փաստաթուղթ էր հրապարակել, համաձայն որի Սուքիասյանը, ՀՀ այն ժամանակվա վարչապետ Տիգրան Սարգսյանն ու Կճոյանը օֆշորային ընկերության սեփականատերեր են: Հետագայում Սուքիասյանը օֆշորային սկանդալմն իր վրա էր վերցրել՝ հայտարարելով, որ առանց Տիգրան Սարգսյանի և Նավասարդ Կճոյանի գիտության նրանց անունով Wlispera Holdings Limited օֆշորային ընկերությունն է գրանցել Կիպրոսում:

Մանրամասները՝ թերթի այսօրվա համարում