Home / Հայաստան / ՀՔԱ Վանաձորի գրասենյակն աջակցում է ՄԻՊ֊ին, դատապարտում որոշ պատգամավորների պահվածքը

ՀՔԱ Վանաձորի գրասենյակն աջակցում է ՄԻՊ֊ին, դատապարտում որոշ պատգամավորների պահվածքը

Ազգային ժողովում Մարդու իրավունքների պաշտպան Կարեն Անդրեասյանի տարեկան զեկույցի քննարկման ժամանակ բարձրացված հիմնախնդիրներին անդրադառնալու փոխարեն ՀՀ ԱԺ առանձին պատգամավորներ՝ հատկապես ՀՀԿ խմբակցության որոշ ներկայացուցիչներ, իրենց ելույթներով փորձել են վարկաբեկել ՄԻՊ-ին: Այս մասին ասված է «Հելսինկյան քաղաքացիական ասամբլեայի Վանաձորի գրասենյակ» իրավապաշտպան կազմակերպության տարածած հայտարարության մեջ։

Հայտարարության հեղինակները նշում են, որ քննարկումներն ընթացան ոչ թե մարդու իրավունքների խախտումների և դրանց հանգեցնող պատճառների վերացմանն ուղղված քայլերի որոշման տրամաբանությամբ, այլ էժանագին և մարդու իրավունքների սկզբունքները խեղաթյուրող, վարկաբեկող ելույթներով:

«Մենք դատապարտում ենք նման ելույթները և մեր աջակցությունն ենք հայտնում ՄԻՊ-ին, թեկուզ ունենալով որոշ վերապահումներ նրա որոշ դիրքորոշումների վերաբերյալ:

Գտնում ենք, որ ՀՀ ԱԺ պատգամավորն իր դիրքորոշումը պետք է ձևակերպի ՀՀ Սահմանադրությամբ ամրագրված մարդու իրավունքների սկզբունքներին համահունչ, որի հիման վրա միայն կարող է տեղի ունենալ իրավիճակը փոփոխելուն ուղղված գործողությունների ձևակերպում: Հակառակ պարագայում մարդու իրավունքների խախտումներին հանգեցնող պատճառները կմնան չվերացված, որը հանգեցրել է Հայաստանի Հանրապետությունում անպատժելության և անպատասխանատվության մտածելակերպի ու գործելակերպի ձևավորմանը», ֊ ասված է ՀՔԱ Վանաձորի գրասենյակի հայտարարության մեջ, որտեղ կոնկրետ պատգամավորների ելույթներ չեն մատնանշվում:

Հայտարարության հեղինակները զեկույցի կարևոր կետեր են համարում օմբուդսմենի կողմից արձանագրված այն փաստը, որ 2008 թ. մարտի 1-ին տասը սպանված քաղաքացիների գործերով մեղավորները չեն բացահայտվել, ինչպես նաև ոստիկանության աշխատակիցների կողմից քաղաքացիների ազատ հավաքների իրավունքի իրականացման կոպիտ խախտումները, մարդու արժանապատվությունը նվաստացնող և վատ վերաբերմունքի, խոշտագումների, բռնությունների փաստերով ոչ պատշաճ քննության վիճակը։

Լուսանկարում՝ ՀՔԱ Վանաձորի գրասենյակի ղեկավար Արթուր Սաքունց