Epress.am Լուրեր Հայաստանից
Հունվարի 17-ին երեկոյան Գյումրիում ոստիկանները, քաշքշելով ու հարվածներ հասցնելով, Ռիժկովի փողոցից ոստիկանություն են բերման ենթարկել երկու ռուս զինծառայողի: Այս մասին գրում է «Հայկական ժամանակ» օրաթերթի armtimes.com կայքը: Թերթի թղթակիցը, ով գտնվում է Գյումրիում, անձամբ է ականատես եղել բերման ենթարկելու տեսարանին:
«Ոստիկանները եղել են քաղաքացիական հագուստով: Նրանք նշել են, որ զինծառայողը եղել է հարբած: Իսկ թե հարբած զինծառայողը կոնկրետ ինչ է արել Գյումրիում, ոստիկանները չեն ասել:
Գյումրիի ԳԱԼԱ հեռուստաընկերության փոխանցմամբ՝ Ռիժկովի փողոցում նախ երկու ռուս զինծառայող վիճաբանել են, այնուհետև նրանց «բաժանող» քաղաքացիների հետ է վիճաբանություն ծագել:
Ոստիկանության լրատվականի աշխատակից Արմեն Մալխասյանն ասաց, որ ռուս զինծառայողին բերման ենթարկելու վերաբերյալ տեղեկությունը իրականությանը չի համապատասխանում:
Մեր նկատառմանը, որ ՀՀ ոստիկանության Շիրակի մարզային վարչության պետի տեղակալ Աշոտ Գրիգորյանը ԳԱԼԱ-ի հետ զրույցում հաստատել է այդ տեղեկությունը, Մալխասյանը այսպես է պատասխանել. «Ես նոր խոսեցի Գրիգորյանի հետ, ասեց թյուրըմբռնում ա եղել»», – մասնավորապես, գրում է Armtimes.com-ը:
ԳԱԼԱ-ն նշում է, որ, նախնական տեղեկությունների համաձայն, զինծառայողներն արդեն զորամասում են: