Զոհված զինվորների խնդիրը Ցեղասպանության ճանաչում պահանջողներին չի հետաքրքրել

Ոստիկանների մոտ 20 հոգանոց խումբ այսօր հերթական անգամ թույլ չի տվել բանակում զոհված զինծառայողների ծնողներին բողոքի ակցիա անցկացնել նախագահական նստավայրի մոտ: Ծնողների դեմ ոստիկանների պատնեշ է ստեղծվել նախագահական նստավայրի նամակների և ընդունելությունների բաժնի դռան մոտ:

Ակցիա անցկացնող որդեկորույս մայրերն ասել են, որ իրենք ազատ հավաքների իրենց իրավունքի ոտնահարումը բողոքարկելու են մինչև ՄԻԵԴ՝ հիշեցնելով, որ ՄԻԵԴ-ն արդեն ճանաչել է այդ իրավունքի ոտնահարումը ՀՀ-ի կողմից՝ ոստիկանությունում մահացած Լևոն Գուլյանի հիշատակին մոմավառություն անելու գործով: 

Ոստիկանները չէին խոչընդոտում ոչ այլ քաղաքացիների ազատ տեղաշարժը մայթով, ոչ այլ ակցիաները: Այսօր նախագահականի հարևանությամբ գնտվող Բրիտանական դեսպանատան մոտ ակցիա էին անցկացնում Հ.Յ.Դ. Հայաստանի Երիտասարդական և «Նիկոլ Աղբալյան» ուսանողական միությունները: Նրանք դեսպանատուն են հանձնել Հայոց Ցեղասպանության 100-ամյա տարելիցի հետ կապված պահանջագիր:

«Մենք էլ ենք հիշում ու պահանջում: Մենք դա էլ ենք հիշում (նկատի ունի ցեղասպանությունը – խմբ.) սա էլ ենք հիշում,- ցույց տալով զոհվածների նկարները՝ դաշնակցական երիտասարդներին ասել է 2001 թվականին զոհված Արայիկ Մկրտչյանի մայրը՝ Անահիտ Մկրտչյանը։ ֊ Պահանջում ենք՝ նախագահն ընդունի, մարդասպանները պատասխան տան իրենց արածի համար: Պահանջում ենք, որ ձեր նմանները գնան, խաղաղ բանակում ծառայեն»:

Epress.am-ի հետ զրույցում երիտասարդներից մեկն ասել է, որ իրենք առաջին անգամ են լսում խաղաղ պայմաններում զոհված զինվորների այս դեպքերի մասին: «Թող Եվրադատարան բողոքեն, խի՞ են ստեղ բողոքում: Եթե Հայաստանի դատական համակարգը 2000 թվից, օրինակ, բան չի արել, էլ չի անի»,- խորհուրդ է տվել երիտասարդներից մեկը:

Միևնույն ժամանակ, երիտասարդը վստահություն է հայտնել, որ եթե զինվորների սպանած լինեին, «ՊՆ-ն մի քայլ կաներ»։

«Մարդ կա՝ ինքը իր պատճառով ա մահացել, ինքնասպան ա եղել, սպանություն համարելով՝ եկել են ստեղ»,֊ մեկնաբանել է երիտասարդը։

Մոտ 5 րոպե ծնողներին լսելուց հետո՝ երիտասարդները հեռացել են՝ հայտարարելով, որ այս խնդիրն իրենց չի վերաբերում: