Ռուսաստանը տիրապետում է Հայաստանից իր երկիր մտած ապրանքների ցուցանիշներին, Հայաստանը՝ ոչ․ «168 ժամ»

ՀՀ պաշտոնական վիճակագրության համաձայն, այս տարվա առաջին եռամսյակում Հայաստանից Ռուսաստան արտահանումը նախորդ տարվա առաջին եռամսյակի համեմատ՝ նվազել է 47.6 անգամ: Նախորդ տարվա առաջին եռամսյակում դեպի ՌԴ արտահանվել է 65.3 միլիոն դոլարի ապրանք, այս տարվա առաջին եռամսյակում՝ 1.4 միլիոն դոլարից էլ քիչ: «168 ժամ» պարբերականը գրում է, որ Ազգային վիճակագրական ծառայությունն ու էկոնոմիկայի նախարարությունը եռամսյակի ընթացքում բազմիցս պարզաբանել են, որ այս խայտառակ ցուցանիշները պայմանավորված են ԵՏՄ երկրների միջև փոխադարձ առևտրի ցուցանիշների ոչ ամբողջական հավաքագրմամբ, և այդ տվյալները հետագայում ենթակա են ճշգրտման:

«Արդեն 5-րդ ամիսն է՝ Հայաստանը ԵՏՄ անդամ է, սակայն մեզ հորդորում են էլի սպասել՝ արտաքին առևտրի ճշգրտված թվերն իմանալու համար: Սակայն սպասելու անհրաժեշտություն չկա, որովհետև ՀՀ-ՌԴ արտաքին առևտրի տվյալները կարելի է գտնել նաև Ռուսաստանի պաշտոնական աղբյուրներում: Այսպես, ՌԴ մաքսային ծառայության տվյալներով՝ 2014 թվականի առաջին եռամսյակում Հայաստանից ներմուծումը կազմել է 60.8 միլիոն դոլար (ՀՀ տվյալներով՝ 65.3 միլիոն դոլար էր): Իսկ այս տարվա առաջին եռամսյակում, ըստ ՌԴ մաքսային ծառայության, Հայաստանից ներմուծումը կազմել է 24.1 միլիոն դոլար: Այն, ինչը ռուսների համար ներմուծում է, մեզ համար՝ արտահանում է: Ու ստացվում է, որ ՌԴ պաշտոնական տվյալներով՝ Հայաստանից Ռուսաստան արտահանումը նվազել է 2.5 անգամ: Ընդ որում, որևէ տեղ չի նշվում, որ տվյալները թերի են, ինչից կարելի է ենթադրել, որ սրանք վերջնական և ճշգրտված թվեր են: Իսկ ինչպե՞ս է ստացվում, որ Ռուսաստանը տիրապետում է Հայաստանից իր երկիր մտած ապրանքների ցուցանիշներին, իսկ Հայաստանը՝ ոչ, գրեթե անհնար է պատասխանել»,–գրում է թերթը։

Հոդվածն ամբողջությամբ ՝ թերթի այսօրվա համարում