Epress.am Լուրեր Հայաստանից
«Նաիրիտ» գործարանի որևէ աշխատակցի երեխա ուսման վարձի չվճարման պատճառով բուհից դուրս չի մնացել, որևէ այդպիսի ուսանողի բուհական ուսումնառությունը չի կասեցրել: Այս մասին ՀՀ ԱԺ ՀԱԿ խմբակցության պատգամավոր ՆԻկոլ Փաշինյանի հետ զրույցում հայտարարել է Կրթության և գիտության նախարար Արմեն Աշոտյանը:
Երեկ Փաշինյանը հանդիպել է ՀՀ կառավարության շենքի մոտ բողոքի նստացույց անցկացնող նաիրիտցիներին, ովքեր խնդրել են զբաղվել իրենց երեխաների վարձերի վճարման ժամկետի հետաձգման հարցով: Հիշեցնենք, որ ավելի վաղ նաիրիտցիներին վարձերի վճարման ժամկետը հետաձգելու խոստում էր տվել վարչապետ Հովիկ Աբրահամյանը, սակայն գործարանի աշխատակիցներն ահազանգել էին, որ ԵՊՀ-ն չի ընդառաջում իրենց երեխաներին:
Ինչպես Փաշինյանն է երեկ գրել «Ֆեյսբուք» սոցիալական ցանցի իր էջում, Աշոտյանն իրեն հավաստիացրել է, որ եթե հայտնի դառնա որևէ դեպք, որը հակասում է նախարարի տրամադրած տեղեկատվությանը, հարցը նույնպիսի դրական լուծում կստանա: Փաշինյանը նաիրիտցիներին խնդրել է տեղեկացնել նման դեպքերի մասին:
Հիշեցնենք, որ «Նաիրիտ» գործարանի աշխատակիցները ՀՀ կառավարության շենքի դիմաց երկօրյա նստացույց են արել՝ պահանջելով լուծել իրենց չվաճրված աշխատավարձերի խնդիրը: Երեկվանից նրանք դադարեցրել են նստացույցը և յուրաքանչյուր երեքշաբթի ու հինգշաբթի բողոքի ակցիաներ են անցկացնելու ՀՀ նախագահի նստավայրի և կառավարության մոտ: