Epress.am Լուրեր Հայաստանից
Զոհված զինծառայողների մայրերի նկատմամբ նախագահական նստավայրի դիմաց ոստիկանության կիրառած ուժի հարցով քննությունը ՀՔԾ֊ում անիմաստ է, քանի որ դեպքի մասին իր դիրքորոշումն արդեն հայտնել է ՀՀ գլխավոր դատախազ Գևորգ Կոստանյանը՝ ճնշում գործադրելով ՀՔԾ֊ի վրա։ Epress.am֊ի հետ զրույցում նման կարծիք է հայտնել իրավապաշտպան Արտակ Զեյնալյանը։
Կոստանյանը, անդրադառնալով միջադեպին, մայիսի 20-ին ԱԺ֊ում, մասնավորապես, ասել էր, որ հասարակության մեջ կարծիք է ձևավորվել, որ եթե ոստիկանությունը ուժ է կիրառում, դա արդեն հանցագործություն է։ «Այդպես չէ։ Ինչպես մեր երկրում, այնպես էլ աշխարհում ոստիկանությունն այն եզակի կառույցներից մեկն է, ով օրենքով մանդատ ունի ուժ կիրառելու»։
«Նա հրապարակայնորեն արտահայտել է այդ դիրքորոշումը, իսկ դատախազը, ի վերջո, ի պաշտոնե պետք է իրականացնի գործի հսկողությունը։ Այդ մարդիկ արդեն արդյունավետ պաշտպանության միջոց չունեն։ Դատարան դիմելն էլ անիմաստ է։ Կարող են դիմել ՄԻԵԴ»,֊ ասել է Զեյնալյանը։
Իրավապաշտպանի խոսքով՝ նախագահական նստավայրի մոտ ակցիա անցկացնող մայրերի նկատմամբ բռնություն կիրառելը խախտել է նրանց՝ հավաքներ անելու իրավունքը, որի բովանդակության մաս է կազմում այն, որ բողոքը պետք է լինի տեսանելի և լսելի վայրում։
«Եթե ասում են՝ թող դիմացի մայթին անեին հավաքը, կարող են ակցիա անողներին բողոքի համար տրամադրել, օրինակ, «Հրազդան» մարզադաշտը։ Եթե ակցիան տեսանելի ու լսելի չէ, ապա ձևական բնույթ է կրում»,֊ ասել է Զեյնալյանը։
Զեյնալյանը հիշեցրել է, որ զոհվածների մայրերի ակցիան կրում էր բացառապես խաղաղ բնույթ։