Վիրահայերը «Աստծո կամքի պատվիրակին» շփոթել էին Սահակաշվիլիի հետ

Վրաստանի նախագահական ընտրություններին 25 թեկնածու էր մասնակցում, որոնցից շատերի անուններն ընտրողներին բացարձակ ծանոթ չէին, գրում է jam-news.net-ը։

Ընտրությունները անցկացվել են հոկտեմբերի 28-ին, առաջին փուլում նախագահ ընտրել չի հաջողվել: Երկրորդ փուլը կկայանա մինչև դեկտեմբերի 2-ը։ Գլխավոր մրցակիցների ձայները գրեթե հավասար են բաժանվել. Սալոմե Զուրաբիշվիլին, որն իշխանությունների թեկնածուն էր, 38,4 տոկոս ձայն էր հավաքել, ընդդիմության թեկնածու Գրիգոլ Վաշաձեն՝ 37,73 տոկոս:

Ընտրությունների «ընդմիշտ» թեկնածուներից է Միխեիլ Սալուաշվիլին, որին այս ընտրություններին անսպասելի անակնկալ մատուցեցին Վրաստանի Նինոծմինդայի մունիցիպալիտետի (Ջավախեթի շրջանը Հարավային Վրաստանում, որը գլխավորապես հայերով է բնակեցված) ընտրողները:

Այդ շրջանում «Արդարության վերականգնման միություն – Ժողովրդի ձայն. Աստված է մեր ճշմարտությունը» շարժման առաջնորդ Միխեիլ Սալուաշվիլին 87 տոկոս ձայն է հավաքել, ինչը կազմում է ընտրողների ընդհանուր թվի գրեթե մեկ տոկոսը՝ 0,92%: Այդպիսի բարձր ցուցանիշ Սալուաշվիլին երկրում ոչ մի տեղ չէր հավաքել:

Ընտրությունների արդյունքում այս թեկնածուն երկրի մասշտաբով 12-րդ տեղն է զբաղեցրել, իսկ Նինոծմինդայում՝ չորրորդ:

Մինչ մայրաքաղաքի լրագրողներն ու Սալուաշվիլին փորձում էին կռահել, թե պատճառը որն է, և ինչն է նինոծմինդացիներին ստիպել իրենց ձայնը տալ մի մարդու, որը նախընտրական արշավի ժամանակ իրենց շրջան չէր այցելել, պատասխանը եկավ տեղական «Նոր» ռադիոկայանից:

Պարզվեց, որ տեղացի որոշ հայեր, որոնք այնքան էլ լավ չեն տիրապետում պետական վրացերեն լեզվին [իսկ բոլոր քվեաթերթիկները հենց վրացերեն էին] «Միխեիլ Սալուաշվիլի» անվան փոխարեն կարդացել էին «Միխեիլ Սաակաշվիլի»: Այսպիսով, նրանք իրենց ձայնը տվել էին նախկին նախագահ Միխեիլ Սաակաշվիլիին, որն ընդհանրապես ընտրարշավին չէր մասնակցում:

Այսպիսի եզրակացության էին եկել տեղական «Նոր» ռադիոկայանի աշխատակիցները՝ զրուցելով տեղացիներից մի քանիսի հետ, որոնք «քվեարկել էին» Սալուաշվիլիի օգտին: Նրանք խոստովանել են, որ առաջին անգամ են լսում այդ անունը, իսկ իրենց քվեն տվել են Սաակաշվիլիին:

Նախընտրական արշավի ժամանակ Սալուաշվիլին ընտրողներին հիշեցնում էր, որ շուտով լինելու է «մեր Տեր Հիսուս Քրիստոսի երկրորդ գալուստը», և այդ իրավիճակում անհրաժեշտ է, որպեսզի երկիրը կառավարի «Աստծո կամքի պատվիրակը երկրի վրա»՝ այսինքն ինքը: Այդպիսին էր Միխեիլ Սալուաշվիլիի ընտրական պլատֆորմը: