Փաշինյան. մեղադրում ենք ո՛չ թե ժողովրդին, այլ նախորդ իշխանություններին

«Մենք մեր ժողովրդին ոչ մի բանի մեջ չենք մեղադրում, մենք մեղադրում ենք նախորդ քաղաքական համակարգը, որ նրանք, աշխատանքը խրախուսելու փոխարեն, խրախուսել են աղքատությունը»: Նոյեմբերի 13-ին Ազգային Ժողովի ամբիոնից ելույթ ունենալիս, ՀՀ վարչապետի պաշտոնակատար Նիկոլ Փաշինյանն ադրադարձել է իր թիմի հասցեին հնչող քննադատությանը, համաձայն որի, իրենք ժողովրդին մեղադրում են ծուլության և չաշխատելու մեջ:

«Քավ լիցի: Այս մասին ես խոսել եմ վարչապետի պաշտոնում ընտրվելուց հետո արդեն երևի տասնյակ անգամ: Մենք մեր ժողովրդին ոչ մի բանի մեջ չենք մեղադրում, մենք մեղադրում ենք նախորդ քաղաքական համակարգը, որ նրանք աշխատանքը խրախուսելու փոխարեն խրախուսել են աղքատությունը: Մարդուն ասել են՝ այ դու աղքատ ես, աղքատության նպաստ ես ստանում, դու ավելի լավ է մի աշխատի, որովհետև հենց որ աշխատես, մենք քեզ աղքատության նպաստից կզրկենք: Մեր հարցը հետևյալն է՝ մենք ինչի ենք աշխատունակ մարդուն ընդհանրապես նպաստ տալիս», – ասել է Փաշինյանը՝ հավելելով, որ իրենց քաղաքականությունն ուղղվելու է ոչ թե աշխատունակ մարդուն նպաստ տալուն՝ պայմանով, որ եթե նա աշխատի, այդ նպաստից զրկվելու է, այլ նշված օգնությունն ավելի թիրախային կտրամադրվի: «Օրինակ՝ երեխայի: Այսինքն, նպաստառուն պետք է լինի ոչ թե երեխայի աշխատունակ հայրը, որն աշխատելու պարագայում կզրկվի այդ նպաստից, այլ շահառուն պետք է լինի երեխան: Մենք պետք է նրան օգնենք և չդնենք պայման՝ եթե քո հայրն աշխատի, մենք քեզ կզրկենք էդ օգնությունից»:

Այսպիսով, ասաց պաշտոնակատարը, կառավարության քաղաքականությունը կա և լինելու է աշխատանքի խրախուսումը. «Մենք մեր քաղաքացիներին քաջալերելու ենք, որ նրանք վեր կենան, ուղղեն իրենց մեջքը, հավատան իրենց ուժերին, որ, այո, իրենք կարող են արդյունք ստեղծել, եվ մենք մեր քաղաքացիներին պետք է կոչ անենք. քաջալերենք, որ նրանք իրենց աղքատության ու հուսահատ վիճակի հետ չհամակերպվեն և ձեռնարկեն կոնկրետ քայլեր այդ վիճակը հաղթահարելու համար, իհարկե, ստանձնելով և ճանաչելով կառավարության պարտավորությունը որոշակի ճանապարհ և հնարավորություններ ստեղծելու համար»: