Home / Առողջապահություն / «Երեխաների քաղաք» չի լինի. Կառավարությունը չեղարկեց քննադատվող որոշումը

«Երեխաների քաղաք» չի լինի. Կառավարությունը չեղարկեց քննադատվող որոշումը

Կառավարությունը ուժը կորցրած ճանաչեց օգոստոսին ընդունած որոշումը՝ անապահով սոցիալական պայմաններում ապրող, հաշմանդամություն ունեցող երեխաների համար «Երեխաների քաղաք» կառուցելու նպատակով «Հայկական Կարիտաս» բարեսիրական կազմակերպությանը Շահումյան և Տափերական համայնքներում հողամասեր հատկացնելու մասին։

Հիշեցնենք, որ որոշումն ընդունվել էր 2019 թվականի օգոստոսի 8-ին։ Նախատեսվում էր, որ պետությունը «Հայկական Կարիտասին» անհատույց հողամասեր և վարելահողեր կտրամադրի Արարատի մարզի Շահումյան և Տափերական համայնքներում, որտեղ հետագայում կկառուցվի «Երեխաների քաղաքը»․ բարեգործական կազմակերպությունը որոշել էր առանձին քաղաք ստեղծել հաշմանդամություն ունեցող և սոցիալապես անապահով շուրջ 600 երեխայի և նրանց ընտանիքների համար։ Կազմակերպությունը պնդում էր՝ դա կնպաստի վերջիններիս լիակատար զարգացմանն ու մանկական աղքատության կրճատմանը։

Ծրագրի բազմաթիվ քննադատները, այդ թվում և Մարդու իրավունքների պաշտպանը, հակադարձում էին՝ ծրագիրը կառուցվում է մեկուսացման և գետոյացման սկզբունքով, ինչը հակասում է ներառականության պահանջին և երեխայի լավագույն շահին։

Աշխատանքի և սոցիալական հարցերի նախարարությունը, Կրթության, գիտության, մշակույթի և սպորտի նախարարությունը միացել էին քննադատություններին։ Սոցապը նշել էր, որ ծրագիրն ակնհայտ հակասում է այաստանի Հանրապետության կողմից վավերացված «Հաշմանդամություն ունեցող անձանց իրավունքների մասին», «Երեխայի իրավունքների մասին» ՄԱԿ-ի կոնվենցիաներին և Կառավարության կողմից այժմ իրականացվող մի շարք ծրագրերին։ Իսկ ԿԳՄՍ-ն, որ նմանօրինակ ծրագիրը ներառականության սկզբունքներ ընդունած մեր երկրի համար ընդունելի չէ:

Նախատեսվում է իրականացնել ծրագրի վերանայման աշխատանքներ։ Ծրագրի փոփոխությունից հետո, անհրաժեշտության դեպքում, կքննարկվի նոր հողամաս հատկացնելու հարցը։

Tekali Taxi