Խոշոր ջրհեղեղ Թուրքիայում․ կան զոհեր

Ջրհեղեղի հետևանքով Թուրքիայի Գիրեսուն նահանգի Դերելի շրջանում 6 մարդ է մահացել, ևս 10֊ն անհետ կորած է համարվում։

Օգոստոսի 23-ի առատ տեղումների հետևանքով Աքսու գետը վարարել և դուրս է եկել հունից, ինչ արդյունքում աներթևեկելի է դարձել Գիրեսուն-Սիվաս ավտոճանապարհը։ 

Մոտակա բնակավայրերի բնակիչները տարհանվել են, տուժածներին աջակցություն ցուցաբերելու համար Գիրեսունի նահանգապետի հանձնարարությամբ հատուկ ճգնաժամային կենտրոն է ստեղծվել։

Ջրհեղեղի վայրում որոնողական աշխատանքները շարունակվում են։

Տեղական ԶԼՄ֊ների փոխանցմամբ, ուժգին ջրհեղեղը քշել է մայրուղում գտնվող մեքենաները։

Գյուղատնտեսության և անտառտնտեսության նախարար Բեքիր Պակդեմիրլիի խոսքով, Գիրեսուն նահանգում անձրևների ջրառատությունը օգոստոս ամսին արդեն իսկ 1.5 անգամ գերազանցում է միջին ցուցանիշը։