Մեղմացումները զինվորների համար չեն․ արձակուրդներն ու այցելությունները կմնան արգելված

Հայաստանի պաշտպանության նախարարությունը հայտարարում է, որ, չնայած հանրապետության տարածքում իրականացվող հակահամաճարակային միջոցառումների որոշ մեղմացումների, զինված ուժերում դեռևս կշարունակվեն կանխարգելիչ միջոցառումները և կգործեն որոշակի սահմանափակումներ: Ըստ սեպտեմբերի 10-ին տարածած հաղորդագրության, այս պահի դրությամբ համաճարակային իրավիճակը զորքերում կառավարելի է:

Կշարունակվեն կիրառվել հետևյալ սահմանափակումները.

–  արգելվում են պարտադիր ժամկետային զինծառայողների բոլոր տեսակի արձակուրդներն ու ազատ արձակումները, տեսակցությունները,

–  խստիվ արգելվում են տեսակցության նպատակով այցելությունները զինվորական կառույցներ, մշտական տեղակայման վայրեր, այդ թվում՝ այցելությունները հոսպիտալներում բուժման մեջ գտնվող զինծառայողներին,

– պայմանագրային զինծառայողներին հանձնարարված է սահմանափակել և հնարավորինս բացառել շփումները քաղաքացիական ազգաբնակչության հետ, չմասնակցել զանգվածային միջոցառումների (խնջույքներ, տոնակատարություններ, թաղման արարողություններ և այլն):

Ոչ կանոնակարգային հարաբերությունների հետևանքով մշտական դարձած բռնությունը չհաղթահարած բանակի ղեկավարությունը սահմանափակումները արդարացնում է մարտունակության բարձ մակարդակի պահպանման անհրաժեշտությամբ։ Զինվորականների շրջանում կորոնավիրուսային վարակի տարածման ծավալները մինչ այժմ գաղտնի են պահվում։