«Իմ քայլ»-ը վերադարձնում է տխրահռչակ Գագիկ Ջհանգիրյանին

«Իմ քայլ» խմբակցությունը Բարձրագույն դատական խորհրդի (ԲԴԽ) անդամի պաշտոնում առաջադրել է նախկին զինդատախազ, «Հայ ազգային կոնգրեսի» նախկին պատգամավոր Գագիկ Ջհանգիրյանը թեկնածությունը։

«Հանդիպումից հետո խմբակցությունը խորհրդակցեց և որոշեց առաջադրել Գագիկ Ջհանգիրյանին որպես ԲԴԽ թեկնածու», – լրագրողների հետ ճեպազրույցում հայտարարել է խմբակցության ղեկավար Լիլիթ Մակունցը։

Այսօր ավելի վաղ խմբակցության պատգամավորները դռնփակ հանդիպել էին Ջհանգիրյանի հետ։ Հանդիպումից հետո Ջհանգիրյանը հայտարարել է, որ եթե իշխանական խմբակցությունն հաստատի իր թեկնածությունը, ինքը կընդունի այդ առաջարկը։

«Ես համաձայնել եմ թվապես մեծամասնության խմբակցության կողմից առաջադրվելու [որպես ԲԴԽ ադամի թեկնածու], բայց ես գործադիր իշխանություն չեմ գնում, քաղաքական պաշտոն չեմ ստանձնում, ես քաղաքական թիմի անդամ չեմ դառնում։ Ես գնում եմ մասնագիտական աշխատանքի։ Ես ուրախ կլինեմ, որ ԲՀԿ-ն, ԼՀԿ-ն էլ այսօր ինձ առաջադրեն, մեծ սիրով կհամաձայնեմ իրենց կողմից ևս առաջադրվելու», – ասել Ջհանգիրյանը։

Նախկին զինդատախազը նշել է նաև, որ ԲԴԽ-ի մեծ մասն իր ուսանողներն ու կոլեգաներն են․ «Ես այնտեղ որևէ վատ մթնոլորտ չեմ տեսնում»։

Ջհանգիրյանի զինդատախազ եղած տարիներին (1997-2008) այդ կառույցի ապօրինություններից ամենահնչեղը Մատաղիսի գործն էր․ երկու զինծառայողների սպանությունը նրա ղեկավարած դատախազությունը հետևողականորեն վերագրում էր երեք անմեղ զինվորների, որոնց Ջհանգիրյանի ենթակաները՝ ծեծելով և նվաստացնելով, ստիպել էին խոստովանական ցուցմունք տալ։ Մեղադրյալները, դատապարտվելով մինչև ցմահ ազատազրկում, հետագայում արդարացվել են և նույնիսկ հաղթել Եվրոպական դատարանում։ Ջհանգիրյանը դրանից հետո էլ ոչ միայն հրաժարվել է ներողություն խնդրել, այլև շարունակել է պնդել, որ ինքը և իր ղեկավարած կառույցը ճիշտ է գործել։

2008-ին պաշտոնը լքած Ջհանգիրյանը մասնակցել է նույն թվականի նախագահական ընտրություններին հաջորդած բողոքի ցույցերին, «Մարտի 1»-ի գործով դատապարտվել, իսկ 10 տարի անց արդարացվել է։ Մարտիմեկյան իրադարձություններից հետո՝ 2012 թվականի մայիսի 6-ին ՀԱԿ-ի համամասնական ցուցակով ընտրվել է ԱԺ պատգամավոր։