Դիրքերում մահվան գործով երկու զինվոր է ձերբակալվել

Մարտի 16-ին մահացած հայտնաբերված զինծառայող Ալբերտ Լևոնի Սիրոյանի գործով երկու զինծառայող է ձերբակալվել՝ գումարտակի մարտական դիրքի պարտադիր ժամկետային զինծառայող Ն. Չ.-ն և մարտական դիրքի պարտադիր ժամկետային զինծառայող, կրտսեր սերժանտ Վ. Ա.-ն։ «Հայկական Ժամանակին» այս մասին հայտնել է ՔԿ մամուլի խոսնակ Վարդան Թադևոսյանը

Ն. Չ.-ն կասկածվում է Քրեական օրենսգրքի 359-րդ հոդվածի 1-ին մասով նախատեսված հանցագործություն կատարելու մեջ (Զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով)։

Կրտսեր սերժանտ Վ. Մ.-ն կասկածվում է ՔՕ 375-րդ հոդվածի 1-ին մասով նախատեսված հանցանք կատարելու մեջ։ (Իշխանությունը չարաշահելը, իշխանազանցությունը կամ իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածությունից կամ խմբային շահերից ելնելով, և եթե դրանք էական վնաս են պատճառել)։

Հիշեցնենք՝ մարտի 17-ին ՊՆ-ն հաղորդել էր, որ մարտի 16-ին, ժամը 21:10-ի սահմաններում, երկրի հարավ-արևելյան ուղղությամբ տեղակայված մարտական դիրքերից մեկում հայտնաբերվել է ժամկետային զինծառայող, շարքային Ալբերտ Լևոնի Սիրոյանի (ծնվ. 2002թ) դին` ծնոտի շրջանում հրազենային վիրավորմամբ:

Ավելի ուշ նույն կառույցը հայտնել էր, որ մարտի 17-ին, ժամը 10:30-ի սահմաններում, Հայաստանի հարավային ուղղությամբ տեղակայված զորամասերից մեկի տարածքում հայտնաբերվել է ժամկետային զինծառայող, շարքային Էդուարդ Ռազմիկի Ռուստամյանի ( ծնվ. 2003 թ.) դին`կրծքավանդակի շրջանում հրազենային վիրավորումով։ 

ՔԿ-ն երկու զինվորների մահվան դեպքերի կապակցությամբ հարուցել էր քրգործեր՝ «Զինծառայողին անզգուշությամբ ինքնասպանության հասցնելու» (ՔՕ 360.1) հոդվածով։ Կառույցը հաղորդել էր նաև, որ երկու զինվորներն էլ մահացել են իրենց ամրակցված ինքնաձիգի կրակոցից։