Կայծակնահարում, ինքնասպանություն, վրաերթ․ 2021-ի բանակային մահերը

ՀՔԱ Վանաձորի գրասենյակը ներկայացրել է 2021 թվականին Հայաստանի և Լեռնային Ղարաբաղի զինված ուժերում զինծառայողների մահվան դեպքերի վերաբերյալ տվյալները, որոնք հավաքագրվել են ԶԼՄ-ներով և պաշտոնական աղբյուրներով տարածված տեղեկությունների, ինչպես նաև ՀՔԱՎ-ի կողմից պաշտոնական կառույցներին ուղղված տեղեկատվության հարցումների պատասխանների հիման վրա:

Ըստ ամփոփված տեղեկությունների՝ 2021 թվականին Հայաստանի և Ղարաբաղի զինուժերում գրանցվել է 76 զինծառայողի մահվան դեպք։

Մահվան դեպքերի պատճառներն են.

• 19-ը՝ հրադադարի ռեժիմի խախտում,
• 17-ը՝ առողջական խնդիրներ,
• 15-ը՝ ավտովթար (որից 2-ը՝ վրաերթի հետևանքով, որը դատախազության կողմից ներառվել է ավտովթարի հետևանքով մահվան դեպքերի թվի մեջ),
• 11-ը՝ սպանություն (3-ը որակվել է որպես 2 կամ ավելի անձանց սպանություն, 4-ը՝ մարտական ծառայության կազմակերպման կանոնների խախտում, 2-ը՝ զենքի օգտագործման կանոնների խախտում (ԶՕԿ), 1-ը՝ սպանություն՝ շատերի կյանքի համար վտանգավոր եղանակով, 1-ը՝ դիտավորյալ սպանություն),
• 9-ը՝ ինքնասպանություն կամ ինքնասպանության հասցնել,
• 5-ը՝ դժբախտ պատահար (1-ը՝ ձնահյուս, 1-ը՝ կայծակնահարում, 1-ը՝ ավտոմեքենայի դետալի հարված, 1-ը՝ ծառի տապալում, 1-ը՝ հանկարծամահ, որը դատախազության կողմից ներառվել է դժբախտ պատահարի հետևանքով մահվան դեպքերի թվի մեջ):

Հրադադարի ռեժիմի խախտման հետևանքով մահացած 19 զինծառայողներից 2-ը  վիրավորում են ստացել 2020 -ի հոկտեմբեր և նոյեմբեր ամիսներին՝ պատերազմական գործողությունների ժամանակ և մահացել են 2021-ին։

6 զինծառայող մահացել է 2021 թ. նոյեմբերին հայ-ադրբեջանական շփման գծում ծավալված ռազմական գործողությունների հետևանքով։

Համեմատության համար՝ 2020-ին գրանցվել է պատերազմական գործողությունների հետ անմիջական առնչություն չունեցող 100 զինծառայողի մահվան դեպք, որից

• 25-ը՝ առողջական խնդիրների հետևանքով են,
• 22-ը՝ ավտովթարի,
• 18-ը՝ ինքնասպանության կամ ինքնասպանության հասցնելու,
• 17-ը՝ հրադադարի ռեժիմի խախտման,
• 9-ը՝ դժբախտ պատահարի (3-ը՝ ձնահյուսի, 1-ը՝ ձորն ընկնելու, 1-ը՝ մեքենայում բռնկված հրդեհի, 1-ը՝ տրակտորի շրջվելու, 1-ը՝ մեղվի խայթոցի, 1-ը՝ էթիլ սպիրտով թունավորման, 1-ը՝ տանը շինարարական աշխատանքների ժամանակ տեղի ունեցած փլուզման հետևանքով),
• 4-ը՝ սպանության (2-ը՝ դիտավորյալ, 1-ը` խուլիգանական դրդումներով սպանության, 1-ը՝ այլ հանցանքը թաքցնելու կամ դրա կատարումը հեշտացնելու նպատակով կատարված սպանության),
• 3-ը՝ զենքի օգտագործման կանոնների խախտման,
• 1-ը՝ մարտական հերթապահություն/ ծառայություն կրելու կանոնների խախտման,
• 1-ը՝ ականի պայթյունի։

«Շարունակում է մտահոգիչ մնալ ինքնասպանության և սպանության հետևանքով մահվան դեպքերի վիճակագրությունը: Ի դեպ, սպանության 11 դեպքերից 3-ն արձանագրել են մեկ ամսվա՝ օգոստոսի ընթացքում, իսկ ինքնասպանության 9 դեպքերից 3-ն արձանագրվել են մայիս ամսվա ընթացքում: Արձանագրում ենք, որ չնայած 2020 թ. համեմատ 2021 թ. արձանագրված մահացության դեպքերի թիվը նվազել է, դեպքերի գերակշիռ մասը՝ 75 %-ը, կրկին տեղի են ունեցել ոչ մարտական պայմաններում», – գրել է ՀՔԱՎ-ը։

Տեղեկանքն ամբողջությամբ՝ այստեղ