Epress.am Լուրեր Հայաստանից
ԲՀԿ-ական պատգամավոր Վարդան Բոստանջյանը միայն համամասնական ցուցակի հրապարակումից հետո է տեղեկացել, որ ինքն այդ ցուցակում ընդգրկված չէ: Այս մասին Բոստանջյանն ասել է Epress.am-ի հետ զրույցում:
ԲՀԿ-ի ցուցակը հաստատվել է երեկ` կուսակցության քաղխորհրդի նիստում, որից հետո հրապարակվել էր ցուցակի առաջին 20-յակը:
Վարդան Բոստանջյանի խոսքով` իր անունը չկա ոչ միայն համամասնական ցուցակի առաջին 20-յակում, այլև առհասարակ ցուցակի վերջին տեղերում:
Մեր հարցին, թե ինչով է պայմանավորված ԲՀԿ-ի` իրեն ցուցակից դուրս թողնելու որոշումը, պատգամավորն ասել է, որ ինքը տեղյակ չէ:
«Ինձ ոչինչ չի ասվել: Ես ցուցակի հրապարակվելուց հետո եմ իմացել, որ չկամ: Ուստի` որևէ մեկնաբանություն չեմ կարող տալ», – ասել է Բոստանջանը:
ԲՀԿ մամուլի խոսնակ Խաչիկ Գալստյանը ևս հրաժարվել է մեկնաբանել ԲՀԿ ցուցակը: «ՄԵնք հրապարակել ենք մեր որոշումը` ինչպես, ում հետ գնալ խորհրդարանական ընտրությունների: Ցուցակը ձեր առջև է, ազատ եք մեկնաբանել»,- ասել է Գալստյանը: