Epress.am Լուրեր Հայաստանից
Ազատազրկման դատապարտված Հայ Ազգային Կոնգրեսի ակտիվիստները որևէ ակնկալիք չունեն Սերժ Սարգսյանի շահերը սպասարկող դատարաններից: Այս մասին Epress.am-ի հետ զրույցում ասել է ՀԱԿ ակտիվիստ Սարգիս Գևորգյանը, ով մասնակցում էր ՀՀ դատախազության առջև այսօր անցկացվող բողոքի ակցիային: Հիշեցնենք, որ Գևորգյանի և իր երեք ընկերների՝ Տիգրան Առաքելյանի, Արտակ Կարապետյանի ու Դավիթ Քիրամիջյանի վերաբերյալ ՀՀ վերաքննիչ դատարանն անփոփոխ էր թողել առաջին ատյանի դատարանի որոշումը, համաձայն որի երիտասարդները պետք է դատապարտվեն 2-ից 6 տարվա ազատազրկման: Այս պահին անազատության մեջ է միայն Տիգրան Առաքելյանը, իսկ մյուս երեքի նկատմամբ ազատազրկումը կկիրառվի, եթե Վճռաբեկ դատարանը նույնպես անփոփոխ թողնի այդ որոշումը:
ՀԱԿ ակտիվիստների փաստաբան Վահե Գրիգորյանը երեկ արդեն ուղարկել է իրենց բողոքը Վճռաբեկ դատարան, որը մեկ ամսվա ընթացքում պետք է որոշումը կայացնի:
«Անկախ նրանից, թե ինչ որոշում կկայացնի Վճռաբեկ դատարանը, և եթե անգամ որոշի, որ մենք ազատազրկվելու ենք, ես մինչև իմ ազատության մեջ մնալու վերջին օրն էլ ընկերներիս հետ միասին պայքարելու եմ այս իշխանությունների դեմ: Ինչ վերաբերվում է Վերաքննիչ դատարանի որոշմանը, ապա դա աննախադեպ որոշում էր, և ապօրինի որոշում, քանի որ դատական նիստերի ժամանակ դատավորը չթույլատրեց մեզ հանդես գալ վերջին խոսքով և պաշտպանական ելույթներով, ինչպես նաև մերժում էր մեր բոլոր ինքնաբացարկների միջնորդությունները: Եվ բազմաթիվ այլ խախտումներից բացի, հենց միայն սա հաշվի առնելով արդեն իսկ Վճռաբեկը պետք է հետ ուղարկի այս գործը», – ասել է Սարգիս Գևորգյանը:
Նշենք նաև, որ այսօր, ակտիվիստներից բացի, ՀՀ դատախազության մոտ էին նաև ԱԺ ՀԱԿ խմբակցության պատգամավորներ Արամ Մանուկյանն ու Լյուդմիլա Սարգսյանը, ՀԱԿ ներկայացուցիչներ Վահագն Խաչատրյանը և Վահագն Հայոցյանը: