Epress.am Լուրեր Հայաստանից
Այսօր ԱԺ-ում տեղի ունեցած ճեպազրույցների ժամանակ խորհրդարանական բոլոր խմբակցությունների ներկայացուցիչները խոսել են 2008 թվականի մարտի 1-ի մասին:
«Ժառանգություն» խմբակցության պատգամավոր Զարուհի Փոստանջյանը, հիշեցնելով, թե ինչ է տեղի ունեցել այդ օրը, ասել է, որ ընդդիմադիր թեկնածուներից մեկը (նկատի ունի ՕԵԿ ղեկավար Արթուր Բաղդասարյանին – խմբ.) ստանձնել է պաշտոններ և այդ իսկ պատճառով հանցակից է դարձել այսօրվա հանցագործություններին նույնպես:
«Եթե գնում են այդ ճանապարհով, ուրեմն հանցակցում են գողերին, ավազակներին, կողոպտողներին, իսկ տվյալ պարագայում այն, ինչ տեղի է ունեցել ՀՀ–ում, դա ուղղակի այլ կերպ չէր կարող բնորոշվել: Մենք դրա համար էլ ասում ենք, այն մարդը, ով կատարել է հանցագործություն, վաղ թե ուշ պետք է պատժվի, իսկ տվյալ դեպքում հանցագործություն կատարողը, գլխավորողը մեկն է, բայց նրա հետ կան հանցակից անձինք և տվյալ դեպքում այդ հանցակից անձինք վաղ թե շուտ, ճիշտ կլինի, որ տան հրաժարականներ: Որովհետև իրենց այդ խմբի ղեկավարը ուշ թե շուտ, միևնույն է, իրենց նաև հանձնելու է: Մենք նաև դրա ականատեսն ենք այս հինգ տարիների ընթացքում: Որովհետև բոլոր նրանք, ովքեր իր համար կեղծել էին, գողացել էին, կան մարդիկ, որ այդ ասպարեզից արդեն դուրս են մղվել: Եթե դուք գնում եք մի հանցագործության մի խմբով, այնպես չի լինում, որ մեկը նվազ հանցագործ է, մյուսը՝ ավել, բոլորն էլ հանցակից են»,- ասել է Զարուհի Փոստանջյանը:
ԱԺ ՀՅԴ խմբակցության ղեկավար Արմեն Ռուստամյանն էլ հույս է հայտնել, որ ապագայում նման դեպքեր ու նման իրադարձություններ երբեք տեղի չեն ունենա: Իսկ թե ինչու չի բացահայտվում Մարտի 1-ը, պատգամավորի համար էլ անհասկանալի է:
«Որովհետև թվում էր, թե բոլորի աչքի առաջ կատարված իրադարձություն է, և առնվազն պետությունը պարտավոր էր տեսաձայնագրել, ամեն ինչ ունենալ, բոլոր ապացույցները ձեռք բերել: Եվ սա իսկապես մինչև հիմա անհասկանալի էր մնացել, ոչ միայն մեզ համար, այլև միջազգային կառույցներում այս խնդիրը անընդհատ մնում է օրրակարգում, որովհետև տասը զոհերի չբացահայտված լինելու հանգամանքը այս ժամանակակից դարում ուղղակի անհասկանալի է:
Խնդիրն այն է, որ, կասկածանքը, պահպանվելով այս էջը մենք չենք կարողանում փակել, որովհետև անընդհատ այդ ծանր բեռը քաղաքական դաշտի, մեր երկրի, մեր ժողովրդի վրա է ծանրանում», – ասել է Արմեն Ռուստամյանը:
ՕԵԿ խմբակցության ղեկավար Հեղինե Բիշարյանը նշել է, որ ինքը ոչ դատավոր է, ոչ դատախազ, և չի կարող որևէ մեկին մեղադրել:
«Եղել են բախումներ, եղել են զոհեր։ Համապատասխան մարմինները զբաղվել են դրանով, համապատասխան մարդիկ դատապարտված են: Գուցե և չի բավարարում, այն ինչ տեղի է ունեցել կամ ովքեր որ դատապարտվել են, դրանով չի լուծվել այն բոլոր դժգոհությունները, որոնք դեռևս առկա են, դա մեկ այլ խնդիր է»,- ասել է Բիշարյանը: Երբ լրագրողները հարցրել են, թե ովքեր են այդ դատապարտված մարդիկ, Հեղինե Բիշարյանն տարակուսած պատասխանել է. «Այսօր ովքե՞ր են դատապարտված ու նստած բանտում»: Երբ լրագրողները կրկին նշել են, որ Մարտի 1-ի համար ոչ ոք չի դատապարտվել, Հեղինե Բիշարյանը խնդրել է հարցը կրկնել ու ասել է, որ նրանք «դատապարտված են այնքանով որքանով, որ մենք պատկերացնում ունենք, թե ինչ է տեղի ունեցել»:
«Եվ գուցե բառս ուղղակի հասկացվեց, եթե ուղղակի հասկացվեց, ես հետ եմ վերցնում: Ուղղակի ես ավելին ասել չեմ կարող: Իսկ իրականում, դե յուրե դատապարտվողների հետ կապված հետևողականություն պետք է ցուցաբերենք, որ իսկապես դատապարտվողներ լինել»,- ասել է Բիշարյանը:
Լրագրողները ՕԵԿ ներկայաուցիչներին նաև հարցրել են, թե ինչպե՞ս են վերաբերվում Զարուհի Փոստանջյանի այսօր հնչեցրած գնահատականերին, վերջիններս ասել են, որ թեև չեն լսել, թե ում է մեղադրել Փոստանջյանը, բայց Բիշարյանը հորդորել է քաղաքական ուժերին կոռեկտություն ցուցաբերել՝ մեկը մյուսին գնահատականներ տալու հարցում, անկախ նրանից, թե գնահատականը ում է վերաբերում:
«Եվ քաղաքական մշակույթից պետք է տեղյակ լինեն մարդիկ հետո խոսեն: Թե ինչպիսին է քաղաքական մշակույթը, ընտրությունների արդյունքում քաղաքական ուժերն են որոշում, թե հետո իրենք ինչպես են աշխատում: Խորհուրդ կտամ մտածել, հետո արտահայտվել»,- ասել է Բիշարյանը:
ՀՀԿ խմբակցության ղեկավար Գալուստ Սահակյանը ասել է, որ Մարտի 1-ի էջը իրավական տեսակետից փակված չի կարող լինել, մինչև բացահայտումներ չլինեն: «Իսկ քաղաքական տեսակետից, բնականաբար, հարցը փակված ենք համարում, որովհետև քաղաքական պրոցեսները այնպես չեն, որ օրեր շարունակ կրկնվող պիտի գնան՝ ընդամենը փորձում են քաղաքականացնել: Նրանք, ովքեր շահարկում են այս երևույթը, այսինքն՝ քաղաքականացնում են, դա էլ ենք նորմալ համարում, բայց գործիք դարձնել միջադեպը՝ կարծում եմ վիրավորական է մեր ամբղոջ ազգի համար»,- ասել է Սահակյանը: