Epress.am Լուրեր Հայաստանից
ՀԱԿ կուսակցության ստեղծումն անհրաժեշտ քայլ էր ՀԱԿ դաշինքը ճգնաժամից փրկելու համար, իսկ այդ ճգնաժամի մեղավորներն էին որոշ մարդ-կուսակցությունները, ովքեր արգելակում էին դաշինքի գործունեությունը:
Այս մասին այսօր լրագրողների հետ հանդիպմանն ասել է ՀԱԿ կուսակցության փոխնախագահ Լևոն Զուրաբյանը՝ չցանկանալով մասնավորեցնել, թե ում նկատի ունի:
«Եթե ես անուններ տամ, ես կխախտեմ մեր սկզբունքը՝ չքննադատել ոչ մի իրեն ընդդիմադիր հորջորջող ուժի: Մենք ունենք մի քննադատության թիրախ՝ դա իշխանություններն են: Անպատասխան ենք թողնելու որևէ քննադատություն, որն ընդդիադիր իրեն համարող ուժից է գալու», – ասել է Զուրաբյանը:
Երկրորդ կարևոր խնդիրը, որ ՀԱԿ կուսակցության ստեղծմամբ լուծվել է, ըստ Զուրաբյանի, այն է, որ անկուսակցականները անդամագրվելով Կոնգրեսին այսուհետ մասնակցելու են որոշումների կայացմանը:
Զուրաբյանն ասել է, որ ՀԱԿ-ն այժմ մարդկային ռեսուրսների առումով ավելի ուժեղ է, քան երբևէ և ագրեսիվ ընտրարշավ է տանելու քաղաքային ընտրություններում: