Epress.am Լուրեր Հայաստանից
Թեղուտի պաշտպանության քաղաքացիական նախաձեռնության անդամները խնդրում են իրենց ևս ներառել Թեղուտի հանքավայրի անօրինական շահագործման վերաբերյալ տեսչական ստուգումների աշխատանքներում: Այս խնդրանքով նախաձեռնութունը բաց նամակով դիմել է Բնահապհանության նախարար Արամայիս Գրիգորյանին։ Նախաձեռնությունը նշում է, որ ստուգումների պահանջով հենց իրենք են հանդես եկել՝ 2012 թվականից ի վեր Բնապահպանության նախարարներին դիմելով: Ի վերջո, նախաձեռնութունը այդ պահանջով դիմել է նաև դատարան:
Ստուգումներն անցկացնելու հարցով դատական վարույթի շրջանակներում Թեղուտ նախաձեռնությունը ստացել է նախարարության գրություն առ այն, որ հունիսի 14-ից օգոստոսի 4-ն ընկած ժամանակահատվածում Թեղուտի հանքավայրում իրականացվելու են տեսչական ստուգումներ: Նախաձեռնությունը ցանկանում է մասնակցել ստուգումներին՝ հաշվի առնելով այն, որ տարիներ տևած աշխատանքի արդյունքում իրավական հարթության վրա իրենք ձեռք են բերվել առարկայական ապացույցներ, որ Թեղուտի հանքավայրի շահագործումն իրականացվում է Հայաստանի Հանրապետության օրենսդրության և միջազգային պայմանագրերի դրույթների կոպիտ խախտումնեով:
«Նոր նախագիծն օրենքով սահմանված կարգով չի ներկայացվել բնապահպանական փորձաքննության և չի դրվել հանրային քննարկումների, ինչն օրենսդրության կոպիտ խախտում է, և բացի հանքավայրի շահագործման դադարեցումից՝ կարող է հանգեցնել նաև պատասխանատուների նկատմամբ քրեական հետապնդման։ Տեսչական ստուգումները լիարժեք իրականացնելու և խախտումներն արձանագրելու համար ձեզ առաջարկում ենք «Բնապահպանական վերահսկողության մասին» ՀՀ օրենքի 37-րդ հոդվածի հիման վրա նախաձեռնության անդամներին ևս ներգրավել տեսչական ստուգումների աշխատանքներին»,- ասված է բաց նամակում: