Հայաստանը կորցնում է անկախությունը. Տեր-Աբրահամյան

Հրապարակախոս Հրանտ Տեր-Աբրահամյանի կարծիքով` ռուսական ռազմակայանների տեղակայման ժամանակահատվածի երկարաձգումը և Ռուսաստանի` անվտանգության ենթադրյալ երաշխավոր դառնալը փաստացի անկախության կորուստ է Հայաստանի համար:

Այսօր Հրանտ Տեր-Աբրահամյանի և քաղաքական մեկնաբան Մենուա Հարությունյանի համատեղ մամուլի ասուլիսին, որին, ի դեպ, վերջինս Վրաստան մեկնելու պատճառաբանությամբ չներկայացավ, Տեր –Աբրահամյանը խոսեց Ռուսաստանի` տարածաշրջանում վերջերս ակտիվացման վտանգների մասին:

Անդրադառնալով Ռուսաստանի կողմից Ադրբեջանին C-300-ի վաճառքին` Տեր-Աբրահամյանը նշեց, որ դա բացարձակ շանտաժ է Հայաստանի Հանրապետության նկատմամբ, և իր զարմանքը հայտնեց հայ քաղաքագետների վերլուծությունների վերաբերյալ, որոնք նորմալ են վերաբերում C-300-ի վաճառքին և փորձում ապացուցել հասարակությանը, որ դա ոչ մի վտանգ չի ներկայացնում:

Այս առիթով Հրանտ Տեր-Աբրահամյանն ասաց, որ ժամանակն է բարձրաձայնել և հասարակայնացնել ռուսական ռազմակայանների Հայաստանից դուրսբերման պահանջը:

«Ռուսական զորքերի ամրապնդումը  մեզ ձեռնտու չէ, որովհետև այն որոշակի գերակայություն է ենթադրում տարածաշրջանում», – ասել է բանախոսը:

Ինչ վերաբերում է վերջին զարգացումների ընթացքում ընդդիմության դերակատարությանը, Տեր-Աբրահամյանի կարծիքով կոնկրետ ռուսական ռազմաբազաների տեղակայման ժամանակի երկարաձգման վերաբերյալ Հայ Ազգային Կոնգրեսի դերակատարությունը չի կարող ազդեցիկ լինել, քանի որ, լինելով ընդդիմություն և չունենալով համապատասխան լծակները, ՀԱԿ-ը չի կարող ազդել գործընթացի վրա:

Նա հավելեց, որ ընդդիմությունը, իհարկե, այդ խնդիրների շուրջ իր կարծիքը կբարձրաձայնի և հասարակական ակտիվություն կապահովի մոտ ժամանակներս: