Epress.am Լուրեր Հայաստանից
ԵԱՀԿ Դաշտային գնահատման առաքելությունը եռանախագահների առաքելություն է, և ՄԱԿ-ի միայն մեկ կառույցից` փախստականների գրասենյակից մեկ-երկու հոգի են ներկայացված որպես տեխնիկական փորձագետներ, այսօր Վրաստանի արտգործնախարար Գրիգոլ Վաշաձեի հետ համատեղ ասուլիսի ժամանակ, պատասխանելով ԵԱՀԿ դաշտային գնահատման առաքելության մասին լրագրողի հարցին, հայտարարել է ՀՀ արտգործնախարար Էդվարդ Նալբանդյանը:
«Տեխնիկական փորձագետները ուղեկցելու են ԵԱՀԿ համանախագահներին և նրանց օգնականներին: ՄԱԿ-ի այլ կառույց որևէ առնչություն չունի այս առաքելության հետ», – ասել է Էդվարդ Նալբանդյանը:
Արտգործնախարարի խոսքով` տվյալ առաքելությունն ուսումնասիրելու է ընդհանուր կացությունն այդ տարածաշրջանում:
«Դուք գիտեք, որ եռանախագահներից երկուսը նոր են նշանակվել և չեն եղել այս տարածաշրջանում, մանրամասն տեղյակ չեն իրավիճակին, և նրանք օգտագործելու են այս առիթը, որպեսզի նաև տեղում ծանոթանան իրավիճակին», – հայտարարել է Նալբանդյանը:
Նրա խոսքով` եռանախագահները Հայաստանում կլինեն հոկտեմբերի 6-ի երեկոյան և, գուցե, հավելյալ մանրամասներ կհայտնեն: