Home / Армения / Դպրոցականներին ծեծելու մեջ կասկածվող ուսուցչի դեմ նախկինում բողոքել են

Դպրոցականներին ծեծելու մեջ կասկածվող ուսուցչի դեմ նախկինում բողոքել են

129 դպրոցի մաթեմատիկայի ուսուցիչ Լենա Աբգարյանն այս ուսումնական տարվա սկզբին հեռացվել է աշխատանքից իր իսկ դիմումի համաձայն: Այս մասին Epress.am-ի հետ զրույցում պատմել է դպրոցի տնօրեն Թամարա Պետրոսյանը:

Նրա խոսքերով` Աբգարյանը դիմում է գրել` խնդրելով ազատել նրան աշխատանքից առողջական վիճակի պատճառով:

Ինչպես ավելի վաղ տեղեկացրել ենք, Facebook հասարական ցանցում հայկական դպրոցներին վերաբերող YouTube-ից նոր տեսահոլովակ է տեղադրվել (http://www.epress.am/FVideo.aspx?vdid=66), որտեղ պատկերված է, թե ինչպես է կին ուսուցչուհին ծեծի ենթարկում երեխաներին:

Սոցիալական ցանցերում և բլոգերում շրջանառվող տեղեկությունների համաձայն` կադրերը նկարահանվել են 129 Գայի (Հայկ Բժշկյանց) անվան դպրոցում, իսկ ուսուցչուհին հենց Լենա Աբգարյան է:

Դպրոց կատարած այցելության ընթացքում մենք փորձեցինք համեմատել տեսահոլովակում պատկերված դասարանը 129 դպրոցի դասարանների հետ: Դպրոցի տնօրեն Թամարա Պետրոսյանի ուղեկցությամբ շրջեցինք դասարաններով, որոնք, ըստ տնօրենի, չորսը տարի է ինչ վերանորոգված են: Նա չի բացառում, որ վերոնշյալ տեսահոլովակը «վաղուցվա նկարահանում է»:

Նշենք, որ տնօրենը` տեսահոլովակը դիտելուց հետո, որտեղ ուսուցչուհուն կարելի է հիմնականում թիկունքից տեսնել, ինչ-որ չափով նմանեցրեց վերջինիս Լենա Աբգարյանի հետ` նշելով, որ «հետևի մասից ինքն էր»: Սակայն, ըստ Պետրոսյանի, աշակերտները նրան ծանոթ չէին:

Լենա Աբգարյանն աշխատում էր դպրոցում 70-ականներիից: Մեկ անգամ` (2006 կամ 2007 թվականին, տնօրենը դժվարացավ հիշել թիվը) ծնողները բողոք էին ներկայացրել նրա դեմ անվայել բառ օգտագործելու համար, ինչի արդյունքում ուսուցիչը նկատողություն էր ստացել:

Մեր հարցին` եղել են արդյոք ուսուցիչների կողմից բռնություն կիրառելու դեպքեր անցյալում և ստացվել են արդյոք բողոքներ, Պետրոսյանը պատասխանել է, որ այս կամ այն դեպքի մասին իմանալու համար ծնողը պետք է բողոքի, ինչը տեղի չի ունեցել, աշակերտներից բողոքներ ևս չեն եղել:

Նշենք, որ այսօր ՀՀ կրթության և գիտության նախարարության ներկայացուցիչը նշել է, որ դեպքը տեղի է ունեցել 129 դպրոցում 4 տարի առաջ մաթեմատիկայի դասի ժամանակ: