Հայաստանն ու Թուրքիան ցանկանում են համագործակցել հանցավորության դեմ պայքարում

ՀՀ գլխավոր դատախազ Աղվան Հովսեփյանն այսօր առանձնազրույց է ունեցել Թուրքիայի Վճռաբեկ դատարանի հանրային դատախազներ Ահմեդ Թասյուրտի և Օմար Յանարի հետ: Հանդիպման ընթացքում կողմերը կարևորել են հանցավորության դեմ պայքարում համագործակցությունը, երկու ժողովուրդների միջև բարիդրացիական հարաբերությունների հաստատումը: Ա.Հովսեփյանը հույս է հայտնել, որ անմիջական և անհատական շփումները կնպաստեն երկու երկրների իրավապահ մարմինների միջև համագործակցության ձևավորմանը:

Ա.Հովսեփյանն ընդունել է նաև Գերմանիայի Դաշնային Հանրապետության Ցելլի գլխավոր դատախազ Հարալդ Ռենջին: Քննարկվել են համագործակցությանը վերաբերող հարցեր:

Գերմանիայի և Թուրքիայի պատվիրակները Հայաստան են ժամանել մասնակցելու հոկտեմբերի 19-21-ը Երևանում կայանալիք Եվրոպայի դատախազների խորհրդատվական խորհրդի 5-րդ լիագումար նիստի աշխատանքներին, հայտնում է Դատախազության պաշտոնական կայքը: