Home / Հայաստան / Փորձում են կոծկել բանակային սպանության գործի մանրամասները. իրավապաշտպան

Փորձում են կոծկել բանակային սպանության գործի մանրամասները. իրավապաշտպան

Մինչև հիմա քննչական ծառայության կողմից դատաբժշկական, դատաձգաբանական, դատակենսաբանական փորձաքննության որևէ արդյունք չի ներկայացվել, իսկ եթե կան արդյունքները և չեն հրապարակվում, ապա դա արդեն օրենքի խախտում է:

Epress.am-ի հետ զրույցում այս մասին ասել է Հելսինկյան ասամբլեայի Վանաձորի գրասենյակի ղեկավար Արթուր Սաքունցը` խոսելով Կամո Այվազյանի գործի մասին:

Հիշեցնենք, որ հուլիսի 28-ին ժամկետային զինծառայող Կարո Այվազյանը Մարտունու շրջանի զորամասերից մեկում հրազենով սպանել էր 5 զինծառայողի և ինքնասպան եղել:

«Ըստ կարգի` 24-27 օրվա ընթացքում պետք է ներկայացվեին նշածս երեք հետազոտությունների արդյունքները, սակայն մինչ այսօր ներկայացվել է միայն մի հետազոտության արդյունք, ըստ որի սպանված 6 զինվորներն էլ ալկոհոլի ազդեցության տակ են եղել: Սա խիստ տարակուսանք է առաջացնում»,- ասել է իրավապաշտպանը:

Նրա խոսքով` գործով քննիչը իրավահաջորդին` Կարո Այվազյանի պապիկին, հայտնել է միայն, որ այժմ փորձում են պարզել, թե որտեղից են նրանք ձեռք բերել ալկոհոլային խմիչքը:

«Ես չգիտեմ, չեմ կարող հասկանալ, թե դա գործի բացահայտմանն ինչ կտա»,- նշել է Սաքունցն ու ավե;ացրել, որ իրենց տվյալներով` մի անգամ այդ քննիչը գնացել է Մարտունու այդ զորամասը, ինչ-որ հետաքննություն արել:

«Ես կարծում եմ, որ այս կանխամտածված դանդաղկոտությունն արվում է նրա համար, որ մտածեն, թե ինչպես գործը նոր հունով տանեն, կարողանան հնարավորինս կոծկել գործի մանրամասները»,- Epress.am-ին ասել է Սաքունցը:

Նա նշել է, որ նման դանդաղկոտության պայմաններում իրենք կմիջամտեն գործին:

«Շուտով իրավաբան կներգրավենք գործին, ինչպես նաև այլ հասարակական և իրավաբանական գործոններ կներգրավվեն: Եվ կարծում եմ` որոշ ժամանակ հետո համապատասխան հայտարարությամբ հանդես կգանք»,- իր խոսքը եզրափակել է իրավապաշտպանը: