Epress.am Լուրեր Հայաստանից
Ժողովրդական կուսակցության նախագահ, ԱԼՄ հեռուստաընկերության սեփականատեր Տիգրան Կարապետյանը համարում է, որ կապուղիների մրցույթում իր հեռուստատեսությանը ներքաշելը քաղաքական որոշում է: Այս մասին այսօր լրագրողների հետ հանդիպման ժամանակ հայտարարել է ինքը` Կարապետյանը:
«Իմ կենտրոնամետ հեռուստատեսությունն էլ փորձեցին գցել մրցակցության մեջ: Ես ոչ այս կողմն էի, ոչ այն կողմն էի» – ասել է նա` նկատի ունենալով իշխանություններին և ընդդիմությանը:
Նա նշել է, որ ինքը փորձել է որևէ կոնֆլիկտ չունենալ իշխանություների հետ:
«Բայց նրանք կպան մեզ: Էստեղ էլ դեմ տվեցին մրցակից»,- ասել է Տիգրան Կարապետյանը` հավելելով, որ այսօր կենտրոնամետության գաղափարը վտանգավոր է Հայաստանում, քանի որ քաղաքական դաշտը բևեռացված է:
«Միայն մենք և Ա1+-ն ունենք մրցակիցներ»,- ասել է քաղաքական գործիչը` նշելով, որ իր մրցակցի` «Երևան» հեռուստաընկերության հետևում կան իշխանական ուժեր:
Կարապետյանը նաև ասել է, որ մրցույթում ինքը իր ձայնը բարձրացնում է «Ա1+»-ի օգտին, և պատրաստվում է հեռուստաընկերությանն օգնելու համար ստեղծված հիմնադրամին գումար փոխանցել: