Home / Հայաստան / Մոսկվայում հիանում են Արոնյանով. հայաստանցին բլիցի աշխարհի առաջնության միանձնյա առաջատար

Մոսկվայում հիանում են Արոնյանով. հայաստանցին բլիցի աշխարհի առաջնության միանձնյա առաջատար

Բլիցի աշխարհի առաջնության երկրորդ խաղային օրը բավական ծանր պայքարում անցավ բոլոր շախմատիստների համար: Առաջին օրվա 14 պարտիաներից հետո առաջին տեղը կիսում էին հայաստանցի Լևոն Արոնյանը և նորվեգացի Մագնուս Կառլսենը, նրանցից ընդամենը կես միավոր էր հետ մնում ադրբեջանցի Շահրիյար Մամեդյարովը, սակայն բոլոր առաջատարներից երկրորդ օրվա ընթացքում սթափ և հաշվենկատ գործեց միմիայն հայաստանցի գրոսմայստերը:

Ինչպես և երեկ, Արոնյանը 14 պարտիաներից բաղկացած այսօրվա մառաթոնն էլ անհաջող սկսեց, սակայն ամեն ինչ շտկեց միջնամասում՝  իրար հետևից մի քանի հաղթանակ տանելով:

Ցավոք, վերջին երկու տուրերում Լևոնը պարտություն կրեց Մագնուս Կառլսենից և Ադրբեջանը ներկայացնող Ռաուֆ Մամեդովից և թույլ տվեց մրցակիցներին մի փոքր մոտենալ իրեն, այլապես Արոնյանի առավելությունը մրցակիցների նկատմամբ վերջին 10 տուրերից առաջ, որոնք կկայանան վաղը, շատ մեծ կլիներ:

Այժմ մեր շախմատիստը 18,5 միավորով գլխավորում է մրցաշարային աղյուսակը, երկրորդը Կառլսենն է` 17 միավորով, երրորդից հինգերորդ տեղերը կիսում են ադրբեջանցի Թեյմուր Ռաջաբովը, ռուսաստանցիներ Վլադիմիր Կրամնիկը և Յան Նեպոմնիաշչին, ովքեր վաստակել են 16-ական միավոր: Սլովակիան ներկայացնող հայազգի Սերգեյ Մովսիսյանը 12,5 միավորով զբաղեցնում է 15-րդ հորիզոնականը 20 շախմատիստների շարքում:

Վաղը Լևոն Արոնյանի խաղացուցակը բավական բարենպաստ է հաջող արդյունք գրանցելու համար: Նա այլևս չի խաղալու Կառլսենի հետ, բացի այդ հանդիպելու է մի քանի ռուսաստանցի շախմատիստների հետ՝  Սվիդլեր, Սավչենկո, Ադրեյկին, Գրաչև, ովքեր գտնվում են մրցաշարային աղյուսակի ստորին հատվածում: