Home / Հայաստան / «Տղերքին նստացրել են Ռոբերտ Քոչարյանն ու Սերժ Սարգսյանը». Սուրենյանց

«Տղերքին նստացրել են Ռոբերտ Քոչարյանն ու Սերժ Սարգսյանը». Սուրենյանց

«Քանի մեր իշխանությունները չեն հասկացել, որ, քաղկալանավոր ունենալով, կորցնում են երկիր, կորցնում են Ղարաբաղ, կորցնում են բանակցային գործընթացում դիրք, դատապարտված են ձախողումների»: Այսօր կայացած մամուլի ասուլիսին նման կարծիք է հայտնել քաղաքագետ Սուրեն Սուրենյանցը:

Խոսելով քաղբանտարկյալ Նիկոլ Փաշինյանի մասին` նա նշեց, որ միացել է քաղկալանավորների` այսօր հրապարակված հայտարարությանը, անկախ նրանից, որ որոշակի տարաձայնությունների ունի «Հայկական ժամանակ» օրաթերթի գլխավոր խմբագրի հետ. «Ես գերադասում եմ մարդու հետ վիճել, երբ նա գտնվում է ազատության մեջ»:

Սուրենյանցի կարծիքով` իշխանությունները «կրկնակի անբարո վարքագիծ» են կիրառում Նիկոլ Փաշինյանի և մյուս քաղկալանավորների նկատմամբ. «Նախ, որպես սկզբունք, անմեղ մարդկանց դատապարտելն արդեն իսկ անբարոյականություն է: Եվ երկրորդը` անբարոյականություն է, երբ որ անմեղ մարդու նկատմամբ կիրառվում են ֆիզիկական, հոգեբանական ճնշման մեթոդներ, ինչին այսօր ականատես ենք»:

Քաղաքագետը ադեկվատ չի համարում Նիկոլ Փաշինյանի և մյուս քաղբանտարկյալների անվտանգության մասին պահանջը. «Պահանջը մեկը պիտի լինի` ապահովեք այդ մարդկանց` ազատության մեջ գտնվելու իրավունքը»:

Նա տեղակացրեց, որ առաջիկա օրերին պատրաստվում է նամակ ուղարկել նախագահ Սերժ Սարգսյանին:

«Ես անցած դեկտեմբերին մեկ այդպիսի նամակ գրել եմ կալանավորների թեմայով, որից հետո հանդիպում եմ ունեցել աշխատակազմի շատ բարձրաստիճան պաշտոնյայի հետ: Ես առաջիկա օրերին չեմ զլանա և Հայաստանի քաղաքացու իրավունքով ևս մեկ նամակ կհասցեագրեմ Հայաստանի նախագահին այդ թեմայով, և հույս ունեմ, որ որոշակի արձագանք կլինի, ինպես եղավ առաջին նամակի դեպքում», – հայտարարեց փորձագետը:

Պատասխանելով հարցին` հնարավոր է արդյոք, որ փորձագետն իր նամակում առաջարկություն անի նաև վերջերս տարբեր խոսակցությունների թեմա դարձած փոքր համաներման մասին լուրը, Սուրեն Սուրենյանցը պատասխանեց.

«Տղերքին նստացրել են Ռոբերտ Քոչարյանն ու Սերժ Սարգսյանը: Ես կամ որևէ այլ մարդ պատասխանատվություն չի կրում մարդկանց ազատազրկման համար: Ցանկացած ձև, որը կօգտագործի հանրապետության նախագահը մարդկանց ազատ արձակելու համար, ես կընդունեմ, բացի մարդկանց պարտադրելուց»: