Epress.am Լուրեր Հայաստանից
Այսօր ՀՀ գլխավոր դատախազության առջև` ի պաշտպանություն «Հայկական ժամանակ» օրաթերթի խմբագիր, քաղբանտարկյալ Նիկոլ Փաշինյանի տեղի ունեցավ ևս մեկ ակցիա: Ակցիան կամզակերպել էր քաղբանտարկյալների և հալածյալների պաշտպանության կոմիտեն: Ակցիային մասնակցում էին Հայ ազգային կոնգրեսի ներկայացուցիչները, նախկին քաղբանտարկյալները և Կոնգրեսի ակտիվիստները:
Նրանք դատախազության առջև վանկարկում էին «Սերժիկ, մարդասպան», «Ազատություն», «Նիկոլ»: Ակցիայի ընթացքում, երբ դատախազության շենքից սկսեցին դուրս գալ շենքի աշխատակիցները, ակցիայի մասնակիցները սկսեցին վանկարկել «Ամոթ, ամոթ»:
Մեկ ժամ տևած ակցիայից հետո ժողովուրդը երթով շարժվեց դեպի ԵԽ գրասենյակ` տանելով ԵԽ գլխավոր քարտուղր Յագլանդին հասցեագրված նամակը: Քաղբանտարկայլների կոմիտեի համակարգող Վարդան Հարությունյանը լրագրողներին ներկայացրեց իրենց Կոմիտեի նախաձեռնած նամակի բովանդակությունը.
«Հակառակ ԵԽԽՎ ընդունած բոլոր բանաձևերի` մասնավորապես վերջին 1677 բանաձևի, Հայաստանի իշխանությունները չեն կատարում դրանց պահանջները, մասնավորապես, չեն ազատում քաղբանտարկայլներին, նույն կերպ շարունակում են չկատարել «Ա1+» հեռուստաընկերության եթեր տրամադրելու, հավաքների ազատությունն ապահովելու և այլ պահանջներ: Մենք պահանջում ենք ԵԽ-ից, նրա Խորհրդարանական վեհաժողովից և Մոնիտորինգի հանձնաժողովից` օգտագործել բոլոր լծակները, դիմել անհրաժեշտ քայլերի, որպեսզի ապահովվի ԵԽԽՎ բանաձևերի պահանջների կատարումը: Իսկ առաջին հերթին` անմիջապես ազատ արձակվեն քաղբանտարկյալները»,- ասված է հայտարարության մեջ:
Հայտարարության մեջ անդրադարձ է կատարվել նաև Նիկոլ Փաշինյանին:
«Քաղբանտարկյալ Նիկոլ Փաշինյանը կալանավայրում ադմինսիտրացիայի գիտությամբ կամ հրահանգմամբ ենթարկվում է բռնությունների: Նրա նկատմամբ հերթական բռնարարքներից հետո չի կատարվել անկախ դատաբժշկական փորձաքննություն, պատշաճ կերպով չեն արձանագրվել և պահպանվել այդ բռնարարքի նյութական ապացույցները, ավելին` նա տեղափոխվել է պատժախուց, ինչի առթիվ արդարադատության նախարարությունը տվել է երկու միմյանց տրամագծորեն հակասող պաշտոնական բացատրություն: Մենք ակնկալում ենք ձեր միջամտությունը, որպեսզի երաշխավորվի Նիկոլ Փաշինյանի ֆիզիկական անվտագությունը և չխոչընդոտվի նրա հրապարակախոսական գործունեությունը»:
Նույնաբովանդակ մի նամակ էլ Քաղբանտարկյալների Կոմիտեն կհանձնի նաև ԵԱՀԿ-ին: