Հայաստանին 32 մլն եվրո կտրամադրեն

Նոյեմբերի 26-ին Հայաստանի Հանրապետության և Եվրոպական Միության միջև ստորագրվեց Պետական կառավարման մարմինների զարգացման համապարփակ ծրագրի (Comprehensive Institution Building (CIB) Program) Շրջանակային փաստաթղթի վերաբերյալ Փոխըմբռնման հուշագիր, ինչը երկու կողմերին կպարտավորեցնի ծրագրի իրականացման շրջանակներում համագործակցել լիարժեք ու արդյունավետ: Այս ծրագրով 2011-2013թթ. ԵՄ-ն Հայաստանին կտրամադրի 32 մլն եվրո, հայտնում են Էկոնոմիկայի նախարարությունից:   

Հուշագիրը ստորագրեցին  Հայաստանում Պետական կառավարման մարմինների զարգացման համապարփակ ծրագրի ազգային համակարգող, ՀՀ էկոնոմիկայի նախարար Ներսես Երիցյանը` Հայաստանի Հանրապետության կառավարության անունից, և  ԵՄ պատվիրակության ղեկավար դեսպան Ռաուլ դե Լուցենբերգերը` Եվրոպական հանձնաժողովի անունից:

ԵՄ – Հայաստան Ասոցացման համաձայնագրի բանակցային դիրեկտիվները ԵՄ Խորհրդի կողմից ընդունվել են  2010 թվականի մայիսի 10-ին, իսկ բանակցությունները սկսվել են 2010 թվականի հուլիսի 19-ին:

Պետական կառավարման մարմինների զարգացման համապարփակ ծրագիրը (CIB) նախատեսված է հատուկ աջակցություն ցուցաբերելու առանցքային այն կառույցներին Հայաստանի Հանրապետությունում, որոնք ներգրավված են լինելու Ասոցացման համաձայնագրի և հնարավոր ԽՀԱԱՀ-ի կնքման գործընթացում, ինչպես նաև կնպաստի ԵՄ հետ հետընդունման (ռեադմիսիայի) համաձայնագրի կնքմանը և վիզային ռեժիմի հեշտացմանը:

CIB ծրագիրն ուղղված է երեք հիմնական ոլորտներում բարեփոխումների իրականացմանը.

ա) Ասոցացման համաձայնագրի բանակցությունների նախապատրաստում, համաձայնագրով նախատեսված դրույթների իրականացում,
բ) աջակցություն  արդարադատության, ազատությունների և անվտանգության ոլորտին,
գ) աջակցություն ԽՀԱԱՀ նախապատրաստական աշխատանքներին: