Epress.am Լուրեր Հայաստանից
Հինգշաբթի օրը Եվրոպական խորհրդարանը հայտարարություն կընդունի Հայաստանում տիրող իրավիճակի, ինչպես նաև Եվրամիություն – Հայաստան հարաբերությունների ներկա վիճակի մասին:
Հայտարարությունը կհնչեցվի Բրյուսելում ծավալված երկկողմ քննարկումների ավարտին, որոնք ընթանում էին Եվրամիության և Հայաստանի միջև ստորագրված համագործակցության և գործընկերության համաձայնագրի շրջանակներում վերջին երկու օրերին: Հայկական կողմից այս քննարկումներին մասնակցում են փոխարտգործնախարար Կարինե Ղազինյանը և Ազգային ժողովի Եվրոպական ինտեգրման հարցերի հանձնաժողովի նախագահ Նաիրա Զոհրաբյանը:
Փաստաթղթում, որը կներկայացվի այսօր, խիստ քննադատություն է հնչեցվում: Օրինակ, մի դրույթ է շրջանառվում պատգամավորների շրջանում, որում նշված է Հայաստանում տասնյակ քաղբանտարկյալների առկայության մասին: Եվրոպական խորհրդարանը կոչ է անում վերջ տալ լրագրողների դեմ հարձակումներին, հիշատակվում են նաև այն թերությունները, որ առկա են երկրի արդարադատության համակարգում, հայտնում է «Ազատություն» ռադիոկայանի Բրյուսելի թղթակից Դան Ալեքսը` միաժամանակ նշելով. «Եթե ամբողջ փաստաթուղթն ենք դիտարկում, ապա այն, ընդհանուր առմամբ, դրական բնույթ ունի: Այստեղ հիշատակված է Հայաստանի առաջընթացը մի շարք բնագավառներում, օրինակ` տնտեսության կամ մարդու իրավունքների ոլորտներում: Սակայն այն, թե ինչպես են ներկայացվել լրատվական դաշտում տիրող իրավիճակը կամ արդարադատության համակարգի թերությունները` այստեղ, իհարկե, շատ խիստ գնահատականներ կան»:
«Այս համատեքստում, իհարկե, Հայաստանի նկատմամբ Եվրոպական խորհրդարանի պատգամավորների ցուցաբերած վերաբերմունքը որոշակիորեն տարբերվում է Վրաստանի հանդեպ ունեցած մոտեցումներից», – նշում է Դան Ալեքսը` հիշեցնելով, թե եվրոպացի պատգամավորների կողմից անցած շաբաթ ինչ ջերմ ընդունելության արժանացավ Վրաստանի նախագահ Միխայիլ Սահակաշվիլին. «Գործնականում, Վրաստանի նախագահի հասցեին որևէ քննադատական խոսք չհնչեց»: