Իշխանություններից կրկին պահանջում են ապահովել Փաշինյանի անվտանգությունը

Մի շարք լրատվամիջոցների և քաղաքացիական հասարակության ներկայացուցիչներ հանդես են եկել քաղբանտարկյալ Նիկոլ Փաշինյանին ազատ արձակելու վերաբերյալ հայտարարությամբ:

Հայտարարության մեջ ասված է.

«Մենք` ներքոստորագրյալ լրատվամիջոցների և քաղաքացիական հասարակության ներկայացուցիչներս, դատապարտում ենք քաղբանտարկյալ, «Հայկական ժամանակ» օրաթերթի գլխավոր խմբագիր Նիկոլ Փաշինյանի վրա վերջերս կատարված հարձակումները:

35-ամյա Նիկոլ Փաշինյանը լրագրող է ու ընդդիմադիր Հայ ազգային կոնգրեսի
ակտիվիստ, ով 2008 թ. մարտից ի վեր հալածանքների է ենթարկվում իր քաղաքական հայացքների համար: Փաշինյանը բանտարկվել է 2009 թ. հուլիսին` 2008 թ. փետրվարի 19-ին կեղծված նախագահական ընտրություններին հաջորդած մարտիմեկյան ողբերգական իրադարձություններով պայմանավորված: Լրագրողը մեղադրվում է իշխանության ներկայացուցչի նկատմամբ բռնություն գործադրելու և զանգվածային անկարգություններ կազմակերպելու մեջ: Դատավարությունը նշանավորվել է օրենքի բազմաթիվ խախտումներով, մասնավորապես` մեղադրող և պաշտպանող կողմերի միջև
հավասարության սկզբունքի մշտական ոտնահարումներով:

Չնայած Եվրոպայի խորհրդի խորհրդարանական վեհաժողովի, Եվրամիության, ԱՄՆ կառավարության, բազմաթիվ այլ միջազգային կազմակերպությունների և
արտասահմանյան կառավարությունների կողմից լուրջ քննադատություններին` հարցը մնում է չլուծված, և Նիկոլ Փաշինյանը ներկայումս երեք տարի տասնմեկ ամիս սահմանված ժամկետով պատիժն է կրում «Արթիկ» քրեակատարողական հիմնարկում:

Վերջերս` «Կոշ» քրեակատարողական հիմնարկում գտնվելու ժամանակ, նրա նկատմամբ ֆիզիկական և հոգեբանական ոտնձգություններ են իրականացվել, քանի որ նա հրաժարվել է դադարեցնել իր թերթում հոդվածներ գրելն ու իշխանություններին անընդհատ քննադատելը: Նախորդ երկու ամսվա ընթացքում Փաշինյանը 4 անգամ հարձակման է ենթարկվել: Վերջին հարձակումը տեղի է ունեցել նոյեմբերի 17-ին` Փաշինյանի քնած ժամանակ` երկու դիմակավոր անձանց կողմից: Նախքան դեպքի հետաքննությունը` ՀՀ արդարադատության նախարարությունը հանդես է եկել հայտարարությամբ` հռչակելով, թե ոչինչ տեղի չի ունեցել, և Նիկոլը դիմակավորներին տեսել է երազում: Հետաքննությունը փաստացի սկսվել է միայն այն բանից հետո, երբ լրագրողը ներկայացրել է կատարվածը` տրամադրելով ապացույցներ` իր անկողնու սավանը` զինվորական «սապոգի և արյան հետքերով: Փաշինյանի առողջությանը և կյանքին շարունակում են սպառնալ լուրջ վտանգներ:

Մենք` ներքոստորագրյալ կազմակերպություններս, պահանջում ենք, որ Հայաստանի իշխանություններն ապահովեն «Հայկական ժամանակ» օրաթերթի գլխավոր խմբագրի կյանքի անձեռնմխելիությունն ու անվտանգությունը, պատժեն ոճրագործներին և արգելեն բոլոր այն գործողությունները, որոնք այս կամ այն կերպ ուղղված են Փաշինյանի անվտանգության դեմ: Մենք նաև պահանջում ենք ՀՀ իշխանություններից, որ Նիկոլ Փաշինյանն անմիջապես ազատ արձակվի»:

Հայտարարության տակ ստորագրել են.

1. «Չորրորդ ինքնիշխանություն» օրաթերթ
2. Հելսինկյան քաղաքացիական ասամբլեայի հայկական կոմիտե
3. «Խոսքի ազատության պաշտպանության կոմիտե» ՀԿ
4. Թրանսփարենսի Ինթերնեշնլ հակակոռուպցիոն կենտրոն
5. Քաղբանտարկյալների կանանց «Շահխաթուն» միություն
6. Հելսինկյան հայկական ասոցիացիա
7. Հելսինկյան քաղաքացիական ասամբլեայի Վանաձորի գրասենյակ
8. Ժուռնալիստների «Ասպարեզ» ակումբ
9. Իրավունքի և ազատության կենտրոն
10. «Մենք-Պլյուս» ՀԿ
11. «Միջնաբերդ» մշակութային-լուսավորչական ՀԿ
12. «Հույս» ՀԿ
13. «Երիտասարդությունը հանուն ժողովրդավարության» ՀԿ
14. «Անկախ լրագրողների ցանց» ՀԿ

Սույն պահանջագիրը բաց է ստորագրության համար: