Վրացիները չեն կարողացել ռադիոակտիվ նյութեր գտնել ճառագայթված հայկական մեքենայում

2009 թվականի հոկտեմբերին Վրաստանում ԱՄՆ դեսպանատունը նամակ էր հղել ԱՄՆ Պետդեպ, որում նամակի հեղինակները գոհունակություն են հայտնում այն կապակցությամբ, որ Միացյալ Նահանգներն օգնել են Վրաստանին վերազինել սահմանային անցակետերը` նոր սարքեր տեղադրելով: Wikileaks.org կայքի կողմից գաղտնազերծված նամակը հրապարակել է բրիտանական Guardian պարբերականի կայքը:

Գաղտնի փաստաթղթում նշված է, որ Միացյալ Նահանգների տրամադրած սարքերից մեկի օգնությամբ, որը տեղադրված է եղել հայ-վրացական սահմանի Սադախլոյի անցակետում, 2009 թվականի օգոստոսի 26-ին հաջողվել է ֆիքսել հայկական մեքենա, որը ռադիոակտիվ ճառագայթման բարձր մակարդակ է արձանագրել: Հայաստանի ու Վրաստանի սահմանին ստուգող սարքը կարողացել է արձանագրել այդ փաստը, սակայն սահմանապահները չեն ձերբակալել Հայաստանի երեք քաղաքացիների, քանի որ հավատացել են վարորդի բացատրությանը: Ըստ վարորդի` ինքը վիրահատություն է տարել և բուժման արդյունքում նրա օրգանիզմում որոշ ռադիոակտիվ նյութերի հետքեր են մնացել:

Նույն մեքենայի հետդարձի ճանապարհին սարքի ազդանշանը կրկին միացել է, և սահմանապահները ստուգել են մեքենան: Սարքերը ցույց են տվել, որ մեքենայում ճառագայթման մակարդակը չափազանց բարձր է: Հայաստանի քաղաքացիները բացատրել են, որ մեքենան երկար ժամանակ կանգնած է եղել Հայաստանում գտնվող իրենց գյուղի շրջակայքում գտնվող ռադիոկայանի մոտ:

Քանի որ հիմնավոր ստուգման արդյունքում մեքենայում ռադիոակտիվ նյութեր չեն հայտնաբերվել, Հայաստանի քաղաքացիներին բաց են թողել:

Նամակի հեղինակները նշում են, որ ամերիկյան Դաշնային հետախուզական ծառայության ներկայացուցիչն այդ հարցի կապակցությամբ արդեն աշխատում է Հայաստանի իշխանությունների հետ:

Գաղտնի փաստաթղթում նաև նշվում է, որ միջադեպը վկայում է այն մասին, որ Վրաստանի կողմից աշխատող հատուկ մասնագետները դեռևս լրացուցիչ վերապատրաստման կարիք ունեն: